“Alegasaun KKN Hasoru Emilia Pires Ameasa Ba OJE 2013”

.

Jornal Independente - Tersa-Feira, 12 Fevereiru 2013 

Diretor Organizasaun Naun-Govermentais Luta Hamutuk Mericio Akara konsidera alegasaun korupsaun Kolusaun no Nepotismu hasoru Ministra Finansas Emilia Pires sei fo ameasa boot ba orsamentu Jeral Estadu 2013, tanba Ministeriu Finansas mak sei jere osan estadu. 

“Ida ne’e loloos dezastre boot, ida ne’e labele husik kleur tanba orsamentu jeral estadu iha ninia (ministra Finansas) mak jere,” dehan Akara ba INDEPENDENTE, segunda (11/2). 

Nune’e, nia husu ba Ministra Finansas Emilia Pires rejigna an husi nia kargu, tanba deskonfia komete KKN relasiona ho alegasaun aprova projeitu ba nia kaben. 

“Loloos ne’e, nia lalika hein tan prosesu oioin, nia tenki deklara ba publiku katak nia la merese ona i diak liu nia rejigna an antes, para fokus hodi responsabliza ninia prosesu,” deha Akara. 

Tanba Akara dehan, orsamentu jeral estadu labele jere husi ema ne’ebe mak deskonfia komete ona KKN. Akara dehan, Ministeriu Publiku ho KAK tenki halo investigasaun lalais tanba kazu ne’e extra-ordinariu ne’ebe involve Ministra Financas ne’ebe maka jere osan estadu. 

Investigasaun ne’e labele fihir se mak halo no haree ninia pozisaun nuudar Ministra, para publika labele iha konfuzaun nia laran,” dehan nia. Akara dehan, alegasaun hasoru ministra finansas, ne’e iha indikasaun forte katak, mosu konflitu interese tanba aprova projeitu ba nia kaben. 

“Ami hanoin hanesan sosiedade sivil kazu ne’e labele konsidera hanesan kazu normal, maibe extra-ordinariu tanba involve Ministra Finansas estadu ninian ida,” dehan Akara. 

Entertantu, antes ne’e Ministra Finansas Emilai Pires hateten, nia pronto atu ba hatan iha Tribunal relasiona ho alegasaun ne’ebe mak hasoru nia konaba aprova projeitu ba nia kaben relasiona ho prosesu sosa ekipamentus saude ba Ospital Nasional Guido Valadares iha tinan kotuk.

.