“23 Fevereiru, Governu Timor Leste-Australia Deside Distinu GS”

.

Jornal Nacional Diario - Kinta-Feira, 07 Fevereiru 2013

Ministru Petrolium Rekursu naturais, Alfredo Pires, deklara, loron 23 fulan Fevereiru tinan ne’e, Governu Timor Leste ho Australia sei desidi hamutuk kona ba kampo Minarai Greater Sunrise (GS) nia distinu.

Prazu ba akordu ne’ebe koalia tiha ona kona-ba Greater Sunrise sei to’o deit loron 23 Fevereiru, tan ne’e Governu Timor Leste no Australia sei hamutuk hodi desidi hikas distinu GS ne’e atu loke dalan ka lae.

“Primeiru hau klarifika, 23 Fevereiru laos remata, tanba kontratu Greater Sunrise ne’ebe Wodside ho Governu rai rua ne’e, sei kontinua nafatin to’o 20-26, saida maka atu akontese ha dia 23 Fevereiru mak prazu ida, prazu ne’ebe dehan katak, se to’o 23 mak planu atu dezenvolve GS seidauk hetan aprovasaun husi autoridade petroleum entaun loke dalan ona ba Australia ka Timor Leste, bele dehan, pronto agora ita buka dalan seluk atu rezolve GS,” esplika Alfredo Pires, Kuarta (6/2) iha PN. 

Alfredo mos kontinua dehan, to’o 23 dalan ba greater Sunrise sei taka hela, maibe depois de 23 dalan hahu loke hikas fali, laos automatiku, maibe dalan loke ona.

“Karik Australia mos bele desidi atu hamate CMATS (Sertain Maritima Agreement of Timor Sea) karik bele Timor Leste, karik nain rua hotu, mas ne’e buat ida ne’ebe mak ita sei husik lai to’o data ne’e aproxima,” haklaken Alfredo Pires.

Entertantu, husu kona ba income ne’ebe tama husi Kampo Minarai Bayu Undan no Kitan inklui mos Gas, loron ida bele hetan to’o 200.000 (Duzentus mil), Alfredo dehan, ne’e la’os kiik.

.