Xanana Seidauk Halo Buat Ida: “Remodelasaun: Xanana, La-sama, No Mari Alkatiri Hala’o Enkontru Segredu”

,

Jornal Timor Post - Sabadu, 19 Janeiru 2013 

Primeiru Ministru Kay Rala Xanana Gusmao hateten, nia parte seidauk halo buat ida iha governasaun mandatu foun nia laran hodi sai hanesan sasukat ida, katak nia governasaun fraku ka ale? 

No sai mos sasukat atu halo remodelasaun ou lae. “Ami seidauk halo buat ida,” Hateten Xanana ba Timor Post hafoin lansa telekomunikasaun foun Telkomcel (Telin), Kinta (17/01), iha edifisiu Telin Aimutin-Dili. 

Antes ne’e, Ministru ba Asuntu Estadu no Prezidenti Konsellu Ministru, Agio Pereira deklara, governasaun neebe foin hahu seidauk iha planu atu halo remodelasaun ba nia membru sira, maske publika kestiona membru balun laiha kapasidade servisu. 

Entertantu, tuir informasaun ne’ebe Timor Post asesu, iha loron segunda (14/01), iha enkontru segredu entre Xanana Gusmao, Fernando La-Sama, Mari Alkatiri no Agio Pereira hodi koalia kona-ba remodelasaun. 

Tuir fontes ba Timor Post ne’ebe besik liu entre lider nain ha’at ne’e haktuir, inkontru segredu ne’e hala’o tanba durante loron hirak Xanana ba akompania tiha nia espoza hala’o operasaun iha Melbourne-Australia, iha membru governu balun halo servisu laloos. 

Fonte ne’e esplika, inkontru ne’e mos involve Mari Alkatiri tanba iha hanoin wainhira halo remodelasaun, membru governu ne’ebe laiha kapasidade no hala’o servisu laloos sei hasai no bele involve mos ema husi opozisaun. 

Antes ne’e tuir Eis Vice Primeiru Ministru ba asuntu administrasaun iha IV Governu, Mario Carrascala’o hateten, atu halo remodelasaun presiza iha duni akonrdu hodi involve opozisaun, maibe, iha ninia observasaun, Partidu maioria votus Congresu Nasional Rekonstrusaun Timor-Leste (CNRT) laiha vontade atu simu opozisaun. 

Nia dehan, se hakarak remodelasaun tenki kria plataforma de intendementu ida katak, bele iha diferensia politika maibe tau perioridade ba kestaun mina, ema hotu tenki konkorda katak tenki maid uni Timor-Leste, nune’e mos atu redus korupsaun, opozisaun ho maioria tenki apoiu. 

 “Hau hanoin opozisaun tenki pronto, hau haree ema hanesan Mari Alkatiri nia vizaun mos kapaas ba Timor-Leste,” dehan Carrascalao. Antes ne’e mos Amu Bispu Dioseze Baucau, Don Basilio do Nascimento hateten, kintu Governu malirin tebes tanba simu mandatu besik tinan ida ona, maibe seidauk hatudu sinal signifikante ruma liuliu iha area infraestrutura.

,