“Veteranus Kodena SEAKL Halo Manipulasaun”

,

Jornal Timor Post - Segunda - Feira, 21 Janeiru 2013 

Veteranus kondena Staf Sekretariu Estadu Antigu Kombatentes Libertasaun (SEAKL) ne’ebe hala’o servisu iha komisaun, halo manipulasaun ba lista veteranus hodi hatun sira nia durasaun luta. 

 “SEAKL nia servisu ne’e laloos, tanba halo manipulasaun ba ema nia durasaun luta, hanesan iha lista premeiru hau nia naran tama iha kategoria 8-14 maibe iha fali lista segundu sira hatun fali ba 1-3,” dehan Matias Sousa Martins ba diariu ne’e, iha edifisiu SEAKL, Caicoli Dili (19/01). 

Matias hateten, nia deskunfia manipulasaun ne’e, husi ema sira ne’ebe servisu iha komisaun nia laran. “It abele hateten katak, sira ne’ebe servisu iha komisaun ne’e sira nia feen no oan sira hetan hotu 8-14 no balun uluk kontra ukun an mos hetan hotu 8-14, ita sira ne’ebe luta ba ukun an no hetan turturasaun oin-oin ne’e lakon ita nia dereitu,” Matias lamenta. 

Tuir Matias ema hotu ne’ebe fo kontribuisaun ba nasaun ne’e iha diretu atu hetan rekomendasaun husi estadu maske labarik. 

 “Maluk sira ne’ebe hetan turturasaun husi Militar Indoenzia balun naran la iha los, uluk komisaun haruka ekipa ida ba rekolla dadus ema sira ne’ebe halo sakrifisiu ba rai ida ne’e, to’o ikus lori fali lista ne’e no taka sai lista ne’e naran la iha, ema sira ne’ebe halimar deit iha sidade laran naran sai fali no hetan dereitu enkuantu sira ne’ebe halo sakrifisiu ba rai ne’e baran laiha,” dehan nia. 

Tanba ne’e, nia hakarak husu ba SEAKL, tenki haree erru sira ne’ebe iha komisaun nia laran hodi hadia para labele halakon ema nia direitu no hamosu deskontente no injustica ba ema sira ne’ebe fo sira nia vida tomak ba nasaun ne’e.

.