“Veneno Lanu Tan Ema Na’in 40 Iha Baucau”

.

Jornal Independente - Tersa-feira, 08 Janeiru 2013 

Veneno (racun) lanu tan ema na’in 40 liu husi hahan ne’ebe mak sira konsume iha Festa Kazamentu iha Suku Tirilolo, Sub-Distritu Baucau, Distritu Baucau iha loron 29 Dezembru 2012. 

Antes ne’e, akontese mos iha Distritu Lautem, labarik estudante sira lori halai ba ospital tanba veneno lanu sira liu husi hahan, kazu ne’e sei iha prosesu investigasaun. 

Bancada FRETILIN liu husi konferensia da imprensa foti kestaun ne’e tanba hetan keixa husi vitima sira. “Iha loron 29 (Dezembru 2012) akontese festa ida serimonia kazamento konvidados no festa nain hetan hotu insefikasaun alimentar tanba sira han hahan ne’ebe mak iha veneno,” dehan deputadu Eladio Fakulto de Jesus liu husi konferensia imprensa segunda (07/01) iha PN. 

Eladio dehan, veneno ne’e kuaze lanu ema nain 100 resin ne’ebe partisipa iha festa kazamentu ne’e maibe nain 40 konsege lori halai ba Hospital referral baucau hodi hetan asistensia saude inklui ema nain rua ne’ebe mak simu sakramentu kazamento. 

Eladio konsidera kazu ne’e organizadu no eziji ba governu halo investigasaun ida ne’ebe klean hodi hetan autor ba kazu veneno ne’e. Eladio mos hatutan tan katak, tuir FRETILIN nia haree, Governu la seriu atu halo investigasaun ba kazu beneno ne’ebe perigu ba ema nia vida, tamba antes ne’e mos akontese ona iha fatin seluk. 

Nune’e nia lamenta tamba, kazu veneno ne’ebe akontese iha fati-fatin fo impaktu ba ekonomia tanba halo povu sira traumatizadu atu sosa hahan hodi konsume no atu vizita ba malu se la prevene sei hamosu dekonfiansa iha komunidade nia let.

.