“Traballador Abilio Mate Iha Korea”

.

Jornal Timor Post - Sesta-Feira, 04 Janeiru 2013

Abilio da Silva de Araujo, trabalador Timor-oan ida ne’ebe servisu iha Korea fila hikas mai Timor Leste ho isin mate iha sesta (04/01) hafoin hetan asidenti iha servisu fatin. 

Abilio hetan asidenti to’o rejulta mate ba ninia an wainhira halao hela servisu dada redi ho ro iha tasi laran.

Tuir kronologia akontesementu ne’ebe mak Diariu Timor Post asesu liu husi karta komunikadu ne’ebe media Ofice SEPFOPE hato’o iha loron sesta (03/01) katak, matebian Abilio servisu ho ro “202happy” iha tasi laran kuaze fulan ida nia laran ona.

No iha 26 Dezembru maizumenus tuku 18:06 lokraik matebian hetan asidenti iha area iha ochong parte soul Korea nian, distansia husi rai maran ba tasi laran maizumenus 16 miles. Motivu akontesementu ne’e, matebian Abilio wainhira dada hela redi, maibe ninia liman tama hamutuk ho redi ba iha makina (katrol) laran, tanba ne’e, makina habit nia liman hamutuk ho redi.

Husi akontesementu ne’e, matebian mate kedas iha fatin tanba tarde hetan apoiu husi ninia maluk trabalador sira seluk. Mate isin matebian Abilio nian oras ne’e polisia sira lori ona ba iha ospital Gunsaun no halot iha mortuariu.

Nune’e mos, Polisia Forensik Korea nian hein hela konfirmasaun husi parte embaixada Timor iha Korea no familia iha Timor, hodi nune’e bele hala’o prosesu autopsia par abele hatene motivu loloos akontesementu ne’e.

Matebian hanesan trabalador, nia moris iha Distritu Ainaro, iha 05 Abril 1988, Matebian mate ho idade 25 ho estatutu klosan, Matebian moris husi aman Francisco de Araujo no inan Flaminha de Orleans husi Sub Distritu Hatubelico, Distritu Ainaro.

Entertantu, matebian nia isin mate, sei lori hikas mai Timor Leste iha sesta (03/01) ohin ho aviaun Merpati maizumenus iha tuku 13:30.

,