Tinan 2013 Ba Oin: “Lere: Ita Sei La Hamaus Malu”

.

Jornal Timor Post - Segunda, 07 Janeiru 2013 Major 

Jeneral Falintil-Forsa Defeza Timor-Leste (F-FDTL), Lere Anan Timur deklara katak, UNMIT nia mandatu remata ona no tinan 2013 ba oin ita Timor oan ho Timor-oan sei la hamaus malu kuandu halimar ho estadu. 

 “Hau hateten ba imi agora ONU ba ona, ita Timor-oan ho Rimor-oan sei la hamaus malu, kuandu imi (Timor-oan balun) la fiar Prezidenti da Republika, Primeiru Ministru, Parlamentu Nasional no Tribunal, no forsa ho Polisia mak imi atu fiar tan se? 

Ne’e signifika katak, inimigu estadu nian,” deklara Lere iha nia diskursu iha serimonia intrega sertifikadu ba organizasaun Sagrada Familia iha Aldeia Sagrada familia, Suku Bidau-Santana, sabadu (05/01). Komandante fitun rua ne’e sublinha, estadu iha poder ho kapasidade atu ukun, forsa kaer kilat atu hasoru estadu nia inimigu sira. 

”Nasoens Unidas mai fanun ita kona-ba violasaun direitus umanus, maibe agora ita mesak ona buat ruma sala bele baku para hanorin malu,” Lere dehan. Tanba ne’e, xefe Estado Maior Jeneral husu ba povu hotu tenki fiar no respeita ita nia forsa (F-FDTL) ho PNTL, Lere hatutan, Prizaun becora ne’e Hotel, la’os atu kastigu ema, ne’eduni nia husu tenki muda fali. 

Nia informa, Estadu ne’e atu tau matan ba organizasaun no tenki lao tuir regras, ita Timor ukun an ona, ida-idak labele halo ninia ketak fali, maibe tenki hamutuk. 

“Hau rona informasaun dehan CPD-RDTL atu troka F-FDTL ne’e hau bulak ona mak imi bele mai troka, ita nasaun ona labele mai halimar fali ho vida Estadu nian,” Lere lamenta. 

Nia hatutan, uluk ita hamutuk iha funu laran hodi luta hetan ukun-an, agora hetan ukun an ona, tenki organizadu, la’os atu kontra edtadu maibe tenki luta ba dezenvolvimentu nasional. 

“Ba imi sagrada familia sira, tenki muda imi nia sentidu ho hanoin ida de’it, bele harii kompania ida par abele kontribui ba ita nia estadu ida ne’e,” Lere Sujere. 

Tuir nia katak, organizasaun ne’ebe organizadu liu iha nasaun Timor maka organizasaun Sagrada familia, nune’e agra ba oin tenki fo buat ruma ba nasaun ida ne’ebe tempu uluk membrus organizasaun ne’e terus ba. 

.