Sorumutu Ana Pessoa-Xanana “Garante Povu Assesu Justisa”

,

Jornal Timor Post - Tersa-feira, 22 Janeiru 2013 

Prokuradoria Jeral Republika (PJR), Ana Pessoa Pinto Segunda (21/01), sorumutu ho Primeiru Ministru Kay Rala Xanana Gusmao hodi deskute kona-ba atu garante povu bi’it la’ek hotu bele asesu ba justica iha Timor-Leste. 

“Hau mai koalia ho Primeiru Ministru kona-ba proposta orsamentu Jeral Estadu 2013, Prokuradoria Jeral Republika (PJR) propoin U$ 4.4 miloens, seo fo prioridade liu ba reforsa institusaun, atu garante povu iha area rurais bele asesu ba justica no lia los,” deklara Prokuradoria Jeral Republika, Ana Pessoa Pinto ba Jornalista sira iha Palasiu Governu, Segunda (21/01). 

Ana Pessoa hateten katak, preokupasaun ne’ebe hato’o relasiona ho preparasaun iha 2014, tan ne’e iha 2013 sei loke delegasaun 3 tan iha Distritu Manufahi, Liquica no Distritu Lautem atu nune’e povu bele hato’o keiza kona-ba kazu ruma ne’ebe akontese. 

Tanba ita rekonese katak, durante ne’e ita nia povu barak iha area rurais iha kazu ruma susar atu hato’o keixa no deklarasaun ba Ministeriu publiku, tanba transporte laiha inklui hahan ba sira mos komplikadu tebes. 

Nia garante katak, liu husi planu iha 2013 ba oin bele reforsa liutan servisu Ministeriu Publiku nian to’o baze bele atende hodi ema hotu bele asesu justisa no lia los. 

“Ami nia proposta ne’e senti rezoavel i fiar katak, osan ne’ebe ami propoin ki’ik maibe sei ejekuta ho diak ba planu ne’ebe iha,” nia konfesa. 

Maibe, nia sublin tan katak, atu gasta kategoria salariu no vensimentu mos presiza aprova kuadru pessoal, tanba wainhira la aprova maka la iha vaga atu halo rekrutamentu, presiza regula didiak para laiha failansu ruma iha planu estrateziku MP nian ne’ebe governu rasik aprova ona.

,