“SIK Fo Xamada Ba Kompania Rua Komete Krimi”

.

Jornal Timor Post - Segunda-feira, 14 Janeiru 2013 

Polisia Nasional Timor-Leste (PNTL) liu husi Servisu Investigasaun Kriminal (SIK) fo ona Xamada ba Kompania rua ne’ebe fo kreditu motor ba publiku. 

Diretor SIK, Calistro Gonzaga hateten, kompania rua ne’e hetan xamada tanba lohi kliente sira ho promete fo kreditu motor, maibe hafoin kliente sira hatama tiha osan, kompania rua ne’e la kumri nia dever. 

 “Hau bolu ona kompania rua mai iha ne’e hodi fo xamada, no sira tenta hela atu bele selu fali ema nia osan ne’ebe hatama ba sira,” dehan Calistro Gonzaga ba Jornalista sira iha nia servisu fatin, Kuartel jeral PNTL, Caicoli, Dili, Sesta (11/1). 

Agora dadaun prosesu kazu ne’e, tama ona ih aprosesu kazu sivil, maibe wainhira laiha hanoin diak husi kompania hodi selu hotu kliente sira nia osan entaun sei prosesu tama iha kazu krime. 

Kliente ne’ebe sai vitima ba kazu ne’e, maioria funsionariu publiku, sira hatama osan ba kompania rua ne’e kleur ona, maibe to’o agora sira seidauk hetan motorizada ne’ebe sira atu kreditu. 

 “Kazu ida rua tama ona iha prosesu, importante ita tenki haree kompania balun malandru oituan, mas ida ne’e kazu sivil nian, maibe bele kanaliza mos ba iha kazu krimi,” dehan Calisto. 

,