“Raul Lemos Hetan Alarma Husi ADN”

.

Jornal Timor Post - Sesta-Feira, 11 Janeiru 2013 

Diretor Ajensia Nasional Dezenvolvimentu (ADN), Samuel Marcal fo alarma ba kompania ATRAMOR ne’ebe nain mak Raul Lemos atu kumpri didiak nia kna’ar hodi hala’o projeitu ne’ebe sei abandona hela. 

Samuel afirma, nia parte halo ona avaliasaun ba kompania ATRAMOR ba projetu konstrusaun ba edifisiu foun komisaun Nasional eleisoens (CNE) iha kolmera no Ponte Aitarak-Laran no nia konsidera prosesu konstrusaun ba projeitu rua ne’e la’o tarde tebes. 

Tuir informasaun ne’ebe Timor Post asesu, Maridu (La’en Kaben) artista kuinesidu husi Indoenzia Krisdayanti (KD), nu’udar nain ba kompania ATRAMOR ne’e halo tiha ona Sub Kontratu ba projeitu rua ne’e (Edifisiu CNE no Ponte Aitarak-Laran) ba kompania seluk hodi kontinua konstrusaun. 

Hatan ba kestaun ne’e, Diretor AND hateten, ne’e responsablidade Consorsio Nasional Timor (CNT) nian, tamba kompania ATRAMOR nu’udar membru CNT, ne’ebe tuir Samuel, halo manajementu ba membru kompania ne’ebe hetan projeitu. 

“Hau rekonese obra CNE agora lao tarde tamba kapasidade Kompania ATRAMOR iha area manajementu, finanseiru no tekniku mos fraku, tanba ne’e maka material ne’ebe tuir loloos hola hikus agora sira hola uluk, rejultadu obra agora lao tarde,” informa Samuel ba Jornalista iha Fatuhada (09/01). 

“Loos duni Ponte Aitarak-laran no edifisiu CNE, kompania laiha duni kapasidade manajementu no tekniku fraku, maibe CNT mak halo jestaun (responsablidade), laos governu mak fo projeitu ne’e ba ATRAMOR, maibe ami sei bolu kompania ATRAMOR atu fo atensaun masimu, kompania ne’e ami nota hela ona” hateten Samuel. 

Tuir regras CNT nian, membru kompania ne’ebe mak laiha kapasidade atu halo projeitu ida, membru CNT seluk bele kontinua kaer fali projeitu ne’e. 

Entertantu, iha oportunidade ne’e Samuel hateten, to’o agora nia parte sei hasoru problema ho regras oin sa mak bele fo Lista metan ba kompania sira ne’ebe mak nakar. 

Nia hatutan, iha implementasaun prakualifikasaun ne’ebe mak ADN mos bele hatene loloos kompania sira ne’ebe mak iha kapasidade no laiha kapasidade.

.