PM Xanana Gusmao: “Membru Governu Labele Manias”

.

Jornal Timor Post - Segunda-Feira, 31 Dezembru 2012

Primeiru Ministru Kay-Rala Xanana Gusmao hateten katak, sei la tolera membru governu ne’ebe maka manias hala’o knaar hodi dezenvolve povu nia moris.

Xanana hato’o kestaun ne’e iha Natal Hamtuk entre membru V Governu Konstitusional iha Centro Convencoes de Dili (CCD), Sesta (28/12).

“Hau husu ba membru governu ho funsionariu estado tomak katak, ita laos atu servi-an, Ita servi mak ita nia povu no labarik sira ne’ebe mak nu’udar jerasuan nasaun, tanba ne’e ho Natal no tinan foun ne’ebe mai tenki servisu maka’as liu tan,” PM Xanana hato’o.

Xanana hatutan tan katak, Hanesan moto V Governu Konstitusional ba tinan 2013 nian “Ho fiar an, Servisu maka’as, sai eroi ba dezenvolvimentu nasional”.

Maibe, agora dadaun espiritu neebe mak uluk veteranus no luta nain sira halo funu durante tinan 24, agora servisu de’it ona, maibe la dun haka’as an, tanba ne’e, Xanana husu tenki fiar an hodi esforsu ho kapasidade tomak hodi sai eroi ba dezenvolvimentu nasaun hanesan iha tempu funu laran.

 “Agora ita kaer rasik kuda talin, tanba ne’e hau husu ba Ministru no diretores tomak atu kaer metin soberania no merese kaer rasik kuda talin, tanba soberania la’os haree husi Bandeira de’it, Bandeira hanesan Simblu deit maibe soberania iha ita nia isin, ita orgaun soberania, membru governu ita mak makina administrative tenki rona malu,” Xanana dehan.

Tanba ne’e, Xanana dehan, wainhira laiha hirarkia ne’ebe mak forte maka ema seluk sei hanaran nafatin katak, membru governu no orgaun sira beik.

“Ema sei aproveita ita kuandu ema konsidera ita fraku hodi habosok nafatin ita, tanba ne’e governu ida agora tenke hamutuk haka’as an ba, tanba iha tinan ida ne’e ita sei ejiji ba malu,” Xanana hato’o. Iha biban ne’e, xefi governu konvida mos labarik sira menor idade ne’ebe mak partisipa iha festa natal konjunta ne’e atu koalia ba orgaun estadu no membru governu sira hodi servisu maka’as hodi prepara mos rekursu humanu iha futuru neebe mak ho kualidade no sai matenek liu ida agora.

Natal hamutuk ne’e harame husi artista estranjeiru hanesan, husi Filipina no Indonezia.

.