“PDHJ Simu Keixa Komunidade Hasoru CPD-RDTL”

.

Jornal Timor Post - Sesta-feira, 25 Janeiru 2013 

Provedoria Direitus Humanus (PDHJ), simu keixa husi autoridade lokal no komunidade iha suku Welaluhu, sub Distritu Fatuberliu, Distritu Manufahi, hasoru Konselu Popular Demokratika-Republika Demokratika Timor-Leste (CPD-RDTL) ne’ebe okupa rai komunidade illegal. 

Adnjuntu PDHJ, Silveiro Baptista ba jornalista sira hafoin partisipa formasaun jornalista iha Yayasan HAK, Farol, Dili, Kinta (24/1), nia dehan oras ne’e dadaun PDHJ simu ona keixa husi autoridade lokal no komunidade hasoru prejensa grupu CPD-RDTL iha Distritu Manufahi. 

Tuir planu, iha tempu badak Adjuntu PDHJ sei dezloka ba Distritu Manufahi hodi koalia ho parte ne’eba para buka solusaun ne’ebe diak. Adjuntu PDHJ deklara, tuir prinsipiu direitus humanus ema hotu bele sirkula iha ne’ebe deit, maibe tenki hatene nia direitu ne’e mos limiti tuir regulamentu no lei ne’ebe vigora iha nasaun ne’e. 

 “Hau konkorda hanoin CPD-RDTL ne’ebe hakarak mobiliza grupu koperativa hodi halo natar ka tos iha Welaluhu tanba, ne’e hanoin diak atu kore dependensia nasaun ba importasaun fos husi rai liur, maibe, hau mos lakonkorda ho mekanismu ne’ebe sira halo tanba okupa rai iha ne’eba laiha konesementu ba autoridade lokal no komunidade sira,” dehan Adjunto PDHJ ne’e ba jornalista hafoin partisipa formasaun jornalista, iha yayasan HAK, Farol, Dili, Kinta (24/1). 

Adjuntu PDHJ ne’e hateten, grupu CPD-RDTL bele hala’o aktividade agrukultura iha ne’eba, maibe sira tenki hatene estatus rai ne’e nian, karik rai ne’e estadu nian tenki liu husi prosesu no konesementu autoridade lokal tanba nasaun ne’e iha orgaun do estado no lei. 

 Adjuntu PDHJ ne’e mos hateten, direitus humanus la proteze ema ne’ebe viola ema seluk nia direitu. “Ema hotu iha direitu atu hetan rai, maibe ema nia rai ita laiha direitu atu okupa, tanba ne’e tenki hatene konseprtu direitu, grupu CPD-RDTL tenki hanoin no hatene titlu rai ne’e oin sa? 

Rai ne’e abandona ou laiha nain, presija sira nia konesementu ba autoridades komunitariu ka lae, tanba ita iha estadu no iha lei atu regula,” dehan Adjuntu PDHJ. 

Tuir lei, wainhira grupu CPD-RDTL hakarak okupa rai estadu tenki koalia ho autoridade lokal, Ministeriu Justica, Ministeriu agrikultura para bele hetan lisensa hodi halo koperativa laos tama ba okupa arbiru deit.

.