“Operador Trator Fa’an Subar Kombustivel”

.

Jornal Timor Post - Segunda-Feira, 31 Dezembru 2012 

Diskonfia operador trator nain tolu (3) iha Aldeia Tudilpo, Suku Beko, Sub Distritu Suai, Distritu Covalima fa’an kombustivel husi programa “Fila rai Gratuita” ne’ebe Ministeriu Agrikultura no Peskas distribui ba to’os na’in sira. 

Realidade agrikultor kuaze besik atus ida resin iha Aldeia refere kada to’o ida selu U$ 50-70 Dollar Amerikanu ba kombustivel. 

 “Ami husu trator fila ami nia to’os, operador sira dehan mina laiha, imi to’os nain rasik sosa mina nakonu iha tanki ho osan kuaze $50, mak trator bele fila rai,” Lamenta Joao de Jesus nu’udar agrikultor batar ba Timor Post iha nia hela fatin, Aldeia Tudilpo, Sku Beko, Kuarta (26/12). 

Atetude ida ne’e, Joao triste tebes ho hahalok operador trator sira iha suku refere, ne’ebe tau kombustivel iha Bidon hodi ba fa’an fali iha merkadu, tan ne’e, agrikultor sira atu fila rai hectares ida tenki ense mina ho litru 70 ba leten. 

Nia dehan, ense rasik konbustivel ne’e akontese deit ba agrikultor sira iha area Holtala (Aldeia Tudilpo nian) maibe Aldeia Vizinu sira seluk hanesan Maukola, Gala, Holbolu hetan fila rai gratuita tanba iha relasaun familia. 

Nune’e, populasaun iha Aldeia refere husu ba Ministeriu agrikultura no Peskas atu kontrola servisu extensionista ho operador sira iha suku refere ne’ebe halo manipulasaun ba kombustivel ba sira nia interese privadu. 

Entertantu, iha Kinta (27/12) diariu ne’e tenta atu konfirma ho operador trator sira, maibe la konsege tamba funsionariu sira la iha fatin tanba hasoru loron bot Natal. 

.