“MP Kontinua Investiga Emilia”

,

Jornal Timor Post - Tersa-feira, 22 Janeiru 2013 

Prokuradoria Jeral Republika (PJR), Ana Pessoa Pinto hateten, oras ne’e dadaun Ministeriu Pibliku (MP) kontinua hala’o prosesu investigasaun ba kazu eis Ministra Emilia Pires ne’ebe deskonfia entrega projeitu emerjensia ba nia kaben Warren Machod. 

“Ita boot sira labele husu mai hau kona-ba investigasaun kazu Ministra financas Emilia Pires nian, tanba agora Ministeriu Publiku sei prosesa investigasaun hela, ne’e segredu justica ninian, imi labele mai koko fali hau,” deklara Prokuradoria Jeral Republika, Ana Pessoa Pinto ba Jornalista sira iha Palaciu Governu, segunda (21/01). 

Maibe tuir informasaun ne’ebe diariu ne’e asesu iha Parlamentu Nasional, oras ne’e dadaun Ministeriu Publiku submete kazu Emilia Pires ba prosesu investigasaun. Tanba Komisaun Anti Korupsaun (KAK) submete ona sira nia rejultadu investigasaun ba Ministeriu Publiku, nia kompetensia atu kontinua prosesa tuir faktus loloos. 

Enkuantu, tuir publikasaun Jornal balun iha tinan kotuk, husi intervista ho Diretor HNGV, Odete da Silva Viegas katak, karta pedidu ho numeru ref. 130/adm/HNGV/III/2012, ne’ebe diretora hato’o ba eis Vice Ministra Saude madalena Hanjam la husu kona-ba ekipamentus ne’ebe fornese husi kompania Mac’s Metalcraft Pty Ltd nain husi Warren Macleod, kaben Ministra Financas, Emilia Pires. 

Publikasaun ne’e hatutan, pedidu ba eis Vice Ministra saude Madalena Hanjan iha loron 22 Marsu 2012 husu atu hala’o kompras urjenti ba ekipamentus mediku nian ne’ebe iha relasaun ho servisu Unidade Haemodialisa maka hanesan, Haemodialisa unidade 2, kama set unidade rua, material konsumaveis ne’ebe iha relasaun ho servisu Hoemodilisia nian. Tuir iha aneksu ne’ebe asina husi Diretora Nasional NALA, Leao Borges, S. Sos. MPH, Xefi departementu de jestaun de Ekipamentu Medika, Avelino Afornso Brites ho Eis Vice Ministra Saude, madalena F. N. 

Hanjam Costa Soares Bsn ne’e propoin orsamentu ho total U$2,004,100.00 hodi fornese item 17 ba ospital no sentru saude sira. Maibe, bainhira pedidu ne’e haruka ba Ministra Finansas Emilia Pires dekreta hahu husi item numeru dahuluk to’o numeru lima mesak sasan ne’ebe fornese husi kompania Mac’s Metalcraft. Husi aktu ne’e, publikasaun Jornal refere dehan, aktu ne’e deskonfia Emilia Pires viola ona dekretu Lei Numeru 10/2005, rejime juridiku ba aprovizionamentu, kapitulu IV inkontabilidade iha Artigu 32 ne’ebe regula kona ba konflitu de interese servidor estadu sira nian.

,