“Movimentu Area Fronteira Naktuka Taka”

.

Jornal Independente - Kuarta-feira, 09 Janeiru 2013 

Temporariamente, Governu Timor Leste no Indonesia taka movimentasaun iha area Fronteira Naktuka, sub Distritu Nitebe, Distritu Oekuse. 

Populasaun husi nasaun rua ne’e sei la halo movimentu tama no sai iha area Fronteira, tanba Polisia sei duni tuir autor ba kazu Timor-oan ida mate no uma balun sunu iha fronteira Naktuka foin lalais ne’e. 

 Iha fulan liu ba, lia na’in Timor-oan ida ho naran Fisen Falo mate iha Fronteira iha nia to’os laran no uma lubun ida hetan sunu husi ema deskonesidu. 

Vise Ministru Negosiu estranjeiru (MNE) Costansio Pinto hateten, to’o agora governu seidauk hatene aktu asasinatu ne’ebe hamate Timor-oan ida iha Fronteira ne’e. 

“Ita lahatene ema ne’ebe mak oho nia, ne’ebe to’o agora sei iha polisia nia liman atu halo investigasaun,” dehan Costansio ba Jornalista sira nia nia servisu fatin (08/01). 

Costansio mos apela ba povu iha Naktuka atu hakmatek tanba investigasaun mak foin bele hatene autores ba kazu ida ne’e. Costansiao dehan, oras ne’e dadaun UPF ho TNI taka ona Fronteira iha area Naktuka hodi evita populasaun husi NTT no Naktuka TL atu labele halo movimentu. 

“Temporariamente prevene populasaun desloka husi sotin (NTT) mai ita (Naktuka) nune’e mos husi Naktuka ba sorin (NTT),” dehan Costansio. Uma populasaun Naktuka neebe hetan sunu, Constansio dehan, seidauk iha indikasaun hetan autor. 

.