“MOP Ameasa Espulsa Engineiru Makelar Projetu”

.

Jornal Independente - Sesta-Feira, 11 Janeiru 2013 

Ministru Obras Publiku (MOP) Gastao Sousa ameasa sei espulsa nia funsionariu no engeneiru tekniku balun ne’ebe sai makelar ka fo projeitu governu nian ba emprezariu sira sen konesementu. 

Gastao identifika iha regularidade barak mosu iha nia ministeriu hafoin simu posse nuudar membru governu iha loron 8 Fulan-Agostu 2012. Nia dehan, se iregularidade sira ne’e kontinua mosu, diak liu tan presiza duni espulsa funsionariu nakar hodi servisu governu la’o diak. 

“Iha regularidade barak mak mosu, e ha sei hasai, tanba governu iha osan atu rekruta fali engeneiru foun servi didiak governu,” informa Ministru Gastao, naibhira hala’o inkontru ho Sekretariu Estadu Obras Publiku, iha salaun inkontru MOP, Kaikoli, Dili, Kinta horsehik. Iha inkontru ne’e, koalia mos kona ba programa governu ba tinan 2013-2017 ne’ebe sei fokus ba estrada, eletrisidade, ponte no projetu seluk tan, MOP simu ona proposta ba projeitu hamutuk 600 iha periodu tinan lima. 

Entertantu, tuir informasaun ne’ebe diario nee rekoilla katak, antes tama fulan-Dezembru 2012, SEOP espulsa nia funsionariu kontratadu nain 7 sein ho razaun klaru. Iha parte seluk, Emprezariu Nasional husi Distritu Liquisa, Vicente da Concecao ‘Railos’ kritika maka’as servisu MOP iha diresaun Sekretariu Estadi elestrisidade mosu familiarizmu, tan nia konsidera, Funsionariu fahe projeitu eletrisidade ba maluk veteranus balun de’it. 

 Railos dehan tan katak, problema seluk maka governu gosta fo projeitu ba emprezariu bo’ot sira, no sai fali makelar hodi fa’an projeitu ba sira nia kolega sira. 

.