MF Susesu Iha IV Governu “Opozisaun ‘Sadik’ MF Fo Provas”

.

Jornal Timor Post - Sesta-Feira, 11 Janeiru 2013

Bancada Partidu Opozisaun FRETILIN sadik Ministra Finansas (FM), Emilia Pires hatudu provas ba susesu no dezenvolvimentu fiziku ne’ebe sai sasukat, ne’ebe hateten katak, MF nia servisu susesu iha IV Governu nia ukun.

“Iha prohrama ne’e ohin (Kinta 10/01) Ministra Finansas aprezenta mesak furak loos, tanba ne’e, ami ezizi Governu tenki hatudu susesu ne’ebe implementa ona iha tinan lima ba kotuk,” Preokupasaun ne’e hato’o husi Deputadu bancada FRETILIN Inacio Moreira iha PN wainhira hala’o audensia ho Ministra Finansas.

“Antes atu tama ba diskusaun jeneralidade no espesialidade, husu ba Ministra Finansas atu kalrifika loloos projeitu ne’ebe abandonadu hahu husi tinan 2008 to’o agora hira, projeitu hira mak halo husi tinan 2008 to’o agora seidauk hotu deit, projeitu hira mka susesu, no total orsamentu ba roll over 2012 ba 2013 ne’e hira, atu nune’e publiku bele asesu,” Inacio husu klarifikasaun.

Aleinde ne’e, Deputadu Mateus de Jesus husi Bancada CNRT mos iha preokupasaun hanesan katak, planu ne’ebe foin dadauk Ministra Financas aprezenta furak tebes, maibe realidade, implementa fiziku laiha progresu deZenvolvimentu ne’ebe lori progresu ba povu no rai ida ne’e, ida ne’e make ma hotu laran susar, tanba Parlamentu Nasional aprova orsamentu boot maibe projeitu barak mak lao paradu, maibe governu nein toma atensaun.

“Faktus maka estrada husi Tunu Bibi ba Maliana neebe kompania entrega obra ba governu iha fulan rua kotuk, maibe agora alkatraun nakloke fali ona, ida ne’e hatudu governu laiha kontrolu ba projeitu neebe governu intrega ba kompania tanba laiha kualidade, entaun orsamentu estadu gasta saugate deit, ne’e inkapasidade iha governu,” Mateus dehan.

Tan ne’e, Mateus sujere atu tinan oin governu labele haree deit iha relatoriu ne’ebe kompania sira hatama, diak liu governu tun iha terenu hodi hare rasik antes halo pagamentu, karik la iha kualidade haruka servisu fali. Entertantu, Ministra Financas Emilia Pires iha audensia ho Parlamentu nasional hateten, susesu ne’ebe durante tinan 5 ne’e, IV Governu halo buat barak no rejultadu fo ona benefisiu ba povu.

 “Realidade ne’ebe agora ita haree maka harii sentru Oliu Pezadu iha Hera ne’ebe oras ne’e povu barak moris ona iha naroman iha sira nia moris, inklui mos susesu barak ne’ebe ita la mensiona,” Emilia Responde.

 Emilia hatutan, iha orsamentu tinan 2013 ho montante U$ 1.797,50 miloens difini ona katak, porsentu 40 ezekuta ba dezenvolvimentu no porsentu 60 ezekuta ba makina estadu. “hau fiar katak orsamentu tinan nee sei sufisiente atu atende progresu dezenvolvimentu iha nasaun foun ida ne’e, liu husi area edukasaun, saude, infraestrutura no seluk tan,” nia tenik.

.