Mate Restu Nain 2 Intrega Fila Fali Medalla: “Gregorio Saldanha: Mate Restu 12 Novembru Suku Becora No Camea Marka Istoria Foun”

.

Jornal Timor Post - Segunda-feira, 14 Janeiru 2013 

Simao Gudinho no Augostu Monteiro ne’ebe durante ne’e simu medalla nudar mate restu 12 Novembru 1991, iha sabadu (12/01) intrega ikas medalla ba komite 12 Novembru tanba la priense kriteriu ne’ebe komite lansa ona ba publiku. 

 “Antese ne’e iha de’it kriteriu katak, se mak uluk involve iha demonstrasaun pasifiku 12 Novembru husi Ingreija Motael ba rate santa Cruz iha direitu ba rejistu, tamba ne’e hau mos ba rejistu no hetan duni medalla,” dehan agusto Mnteiro iha Sede Suku Becora hafoin entrega hikas medalla liu husi komisaun organizadora komite 12 Novembru. 

Kriteriu tolu ne’ebe mak eis mate restu desidi iha kongresu nia laran katak, ema ne’ebe konsidera hanesan mate restu masakre 12 Novembru maka ema ne’e partisipa tomak husi Igreija ba to’o rate, tama iha dalan ba rate no sira ne’ebe hein iha rate. 

Nia hateten, nia ho nia kolega ne’e la priense duni ba kriteriu tolu ne’e tanba, momentu ne’eba sira so partisipa deit iha misa maibe la ba to’o iha rate, ho hanoin ida ne’e maka halo sira desidi hodi intrega hikas medallu ne’ebe mak antes ne’e sira simu ona. 

Nune’e mos, Simao gudhino realsa katak, medalla ne’ebe mak nia simu ona nia rai nafatin, nia la faan tanba ida ne’e rejultadu husi ran no ruin ne’ebe mak joven loriku as’wain sira halo iha momentu ne’eba. “Hau hakarak entrega medallu ne’e iha publiku, tanba hau la priense criteria ne’ebe mak komite deisde ona,” dehan nia. 

Alen de ne’e, Akalu alin husi siku Bina-Raga akresenta mos katak, nia la simu medalla tanba momentu ne’eba partisipa de’it iha misa ba saudozu Sebastiao Gomes nian iha, purtantu nia rasik la partisipa iha demonstrasaun pasifiku 12 Novembru iha Santa Cruz, maibe tuir nia iha ema barak inklui mos Prezidenti Komite 12 Novembru, Gregorio Saldanha la fiar katak, nia la tuir demonstrasaun pasifiko ne’e. “Ida ne’e mak realidade, kuandu tuir dehan tuir, kuandu la tuir dehan la tuir duni,” Akalu Konfesa. 

Tamba ne’e, nia rasik hatene prosesu ne’e, ne’eduni nia la falsifika dokumentus hodi ba simu medallha no osan. Entertantu, Presidenti Komite 12 Novembru Grogorio saldanha kongratula ba Agusto Monteiro no Simao Godinho ne’ebe ho ateen boot, brani hamriik iha publiku hodi deklara an ba publiko katak, sira intrega hikas medalla 12 Novembru nian fila fali ba komite. 

 “Hahalok hanesan ne’e ita foin hasoru iha Bairo Becora no Camea, hau partisipa iha juramentu bairo sira seidauk iha ema ida hatudu hanesan sira nain rua,” dehan Gregorio. 

Purtantu hahalok hanesan nune’e, bele sai ezemplu diak ida ba maluk sira seluk ne’ebe durante ne’e sei subar an para bele rekonese sira nia-an hodi intrega hikas medalla sira ne’e.

.