“Masa CPD-RDTL Konsidera PM Xanana Uza Ditadura”

.

Notisia Husi TVTL - Tersa-kalan, 22 Janeiru 2013 

Masa CPD-RDTL konsidera afirmasaun husi Primeiru Ministru Kay Rala Xanana Gusmao nu’udar ditadura hodi dezafia masa CPD-RDTL, masa ne’e pronto atu infrenta no determinadu simu konsekuensia ne’ebe atu mosu wainhira sai husi Welaluhu, Fatuberliu. 

Hataan kona ba deklarasaun ne’ebe primeiru Ministru pronunsia liu husi transmisaun direta husi Televizaun Timor Leste (TVTL) foin lalais ne’e iha Centro Convensaun Dili (CCD), masa CPD-RDTL konsdiera deklarasaun ne’e kroat hasoru CPD-RDTL. Porta Voz Gil Ferdis hateten, Timor Leste agora hamriik nuudar Estadu ida no la’os Republika ditadura. 

“Iramaun Xanana nia ameasas ho Forcas Polisia no F-FDTL ba veteranus kombatentes sira ne’ebe hala’o kooperativa de pordusaun agrikula iha welaluhu, ne’e hatudu sintomak ditadura hodi dezafia CPD-RDTL, nune’e, veteranus, kombatentes sira pronto atu infrenta no determinadu hodi simu konsekuensia saida de’it mak mosu iha sira nia oin, tamba Timor Leste ne’e estadu ida ho naran Republika Demokratika Rimor Leste i la’os Republika Ditadura Timor Leste,” deklara porta Voz Gil. 

Sira mos husu atu Primeiru Ministru kontaktu ho sira nia dokumentu ofisial ne’ebe sira entrega foin lalais ne’e ba Primeiru Ministru. 

“Diak liu kontaktu CPD-RDTL nia dokumentu ofisial ne’ebe haruka ba iha irmaun Xanana iha loron 16 fulan janeiru tinan 2013 i la’os ho ameasas mak nu’udar solusaun atu halakon depedensia ekonomika estranjeirus ka liberta Povu maubere husi hamlaha, kiak no mukit,” deklara Gil. 

Masa ne’e realsa liu tan katak, inisiativa ne’ebe sira foti hodi okupa rai iha Welaluhu, nu’udar inisiativa diak hodi haluan kooperativa no produsaun agrikula Timor Leste.

,