“Marsu, Mandatu Longuinhos Remata”

.

Jornal Timor Post - Tersa-feira, 22 Janeiru 2013 

Parlamentu Nasional (PN) liu husi komisaun B ba assuntu defeza no seguransa konkorda atu governu determina mandatu komandante Jeral Polisia Nasional Timor-Leste (PNTL), Komisariu Longuinhos Monteiro hodi nomeia ofisial husi instituisaun rasik. 

Prezidenti Komisaun B, deputada Lourdes Maria Bessa hateten, mandatu Longuinhos labele kontinua, tanba nomeasaun husi governu iha de’it periodu rua tuir lei ne’ebe iha. 

“Hau hanoin mandatu komisariu Lnguinhos ninia la bele kontinua, tanba tuir lei mandatu nomeasaun dala rua de’it no labele liu, ne’ebe ema iha instituisaun PNTL preparadu no diak liu hili ema husi PNTL rasik,” deputada Lourdes Maria Bessa hateten iha PN, segunda (21/01), relasiona ho mandatu komandante Jeral PNTL ne’ebe sei remata iha Marsu tinan 2013 ne’e. 

Tuir Lourdes, tinan 2013 bainhira mandatu remata governu bele nomea ofisial sira ne’ebe preparadu husi instituisaun rasik atu bele lidera. 

“Agora ne’e ita haree governu bele nomeia ona Komandante Jeral PNTL husi instituisaun rasik, maibe haree seidauk bele, entaun bele kontinua nomeasaun husi ema sivil,” katak deputada Lourdes. Prezidenti Komisaun B ne’e dehan tan, iha tinan 2013 ne’e nesesariu ona atu governu bele foti ona komandante PNTL mai husi kareira Polisia, tanba iha ofisial barak ne’ebe preparadu ona ba okupa kargu komandante Jeral. 

“Tuir informasaun ne’ebe ami iha, ofisial nain haat ne’ebe preparadu ona ba iha komisariu hodi bele okupa kargu komandante Jeral PNTL,” nia dehan. Maski PN no Governu rasik seidauk deskute kona-ba komandante jeral, maibe komisaun B hakarak komandante Jeral mai husi instituisaun PNTL rasik. 

“Ida ne’e ami husu ona ba Governu, maibe seidauk iha informasaun loloos atu prosesa no atu hili se? Maibe ita hotu hatene katak, Komandante jeral agora ne’e nomeasaun politika,” katak Prezidenti Komisaun B ne’e.

.