“Lucia Lobato Kumpri Sentensa Tinan 5”

.

Notisia Husi TVTL - Tersa-kalan, 22 Janeiru 2013 

Kondenada eis Ministra Justica Lucia Lobato volontariamente entrega aan ba tribunal hodi kumpri sentensa tinan lima hafoin Tribunal rekursu rejeita rekursu extra-ordinaria husi advogadu. 

Oras ne’e dadaun kondenada Lucia Lobato iha ona Prizaun Glenu hodi kumpri desizaun Tribunal. Hafoin Tribunal rekursu rejeita extra-ordinariu ne’ebe hato’o husi advogadu, kondenada Lucia Lobato volontariamente entrega an hodi kumpri sentensa tinan 5 kadeia. 

Antes dezloka ba Prizaun gleno, kondenada Lucia Lobatu ba jornalista hateten, nia kumpri desizaun Tribunal maibe husu atu desizaun ne’e tenki imparsial. 

“Hau sei konteksta nafatin ba ida ne’e, atu hetan justica ne’ebe loos, hau hanoin estadu diretu Demokratiku ida ne’e tenki konsidera hau nia direitu, hau nu’udar husi nasaun ida ne’e, portantu Juis nain 3 ne’ebe julga orseik, juis nain 3 ne’ebe maka julga tiha hau nia prosesu ne’e iha rekursu, juis nain 3 ne’e rasik maka responde hau nia karta husi hau nia advogado sira hodi hateten katak, sei hato’o rekursu ba sira nia desizaun ne’e, hanesan katak, karta ne’e iha rekursu tiha ona e agora juis nain 3 ne’e rasik fali maka halo fali akordu ida hodi rejeita rekursu ne’ebe maka hau nia advogado sira hatama,” dehan Lucia Lobato. 

Advogado kondenada Jose Pedro Camoes hateten, maske nia kliente tama ona prizaun maibe sei kontinua luta hodi buka lia loos ba nia kliente. 

“Kazu konkretu foin desidi horseik, inkonstitusionalidade ne’e reklamasaun sei hato’o orsida ou aban i ekipa sei estuda nafatin desizaun ne’e didiak ho kalma no tempo, dentro do tempu antes de fevereiru hau husu fali pedidu revizaun mos ami tenki estuda didiak lai hodi hato’o revizaun, makes ohin Dr. Lucia la detein maibe nia direitu civil nafatin iha defeza sira,” dehan Pedro. 

Entertantu Luis Lobato nu’udar maun senti triste maibe respeita ba desizaun neebe iha, maibe husu atu desizaun refere laiha intervensaun politika. 

“Se Prosesu ne’e la’o tuir duni buat neebe ohin hau nia alin hateten, signifika katak, iha buat ruma la diak iha laran, ami fiar justica, fiar Tribunal maibe hau mos hatene katak, lei ema mak hakerek i ema ida hola desizaun ba lei, ne’e ema laos maromak, se iha instituisaun ida estadu nian bele halo korupsaun iha Ministeriu ida, Tribunal mos halo korupsaun iha desizaun, se tamba korupsaun mak Lucia Lobato tenki toba iha ne’eba, ami la kontra desizaun ne’e, maibe desizaun ne’e injustu, ema barak naok osan iha Timor Leste, ema balun uluk krekas hela, motor ida mos laiha, bicikleta ida mos laiha, tama iha governu la kleur deit sa’e kareta no halo uma anda bobot, hola uma, hola buat hotu-hotu, ne’e la’os korupsaun? Bele korupsaun, maibe karik ema mak taka matak barak,” dehan Luis Lobato. 

Dezlokasaun kondenada Lucia Lobato husi Dili ba Prizaun Gleno akompania husi defensor justica, familia no Polisia Nasional Timor Leste.

.