“Lucia Deskansa Iha Kadeia”

.

Jornal Timor Post - Kuarta-feira, 23 Janeiru 2013 

Tribunal Rekursu iha segunda (21/01) foti ona desizaun hodi mantein desizaun rekursu ne’ebe fo sai ona, tanba ne’e, kontinua fo kastigu ba eis Ministra Justisa Lucia Lobato. 

Iha tersa Horseik (22/01) 16:00 Otl, Polisia Nasional Timor Leste (PNTL) hala’o mandatu Tribunal hodi lori Lucia ba iha Prizaun Gleno, tanba ne’e, hahu horseik ba oin, Lucia ofisialmente sia hanesan prizioneiru ida durante tinan lima. 

Maibe, Eis Ministra Justica ne’e ho nia familia Lobato tomak konsidera desizaun Tribunal injustu, tanba Ministra ida halakon osan estadu ho valor U$4.000 bele hetan kadeia to’o tinan lima, no ema neebe halakon osan estadu ho valor rihun atus ba atus la hetan kastigu. 

“Horseik lokraik hau simu desizaun akordaun ida husi tribunal Rekursu hodi rejeita ou la simu rekursu ne’ebe hau nia advogadu sira hatama iha 27 de Dezembru liu-ba atu husu Tribunal pronunsia kona ba kontitusionalidade akordaun tribunal Rekursu ne’ebe hau simu 12 Dezembru de 2012,” dehan eis Ministra Lucia Lobato ba Jornalista tersa (22/01) iha nia rezidensia. 

Lucia dehan, desizaun ne’ebe nia simu husi Tribunal ne’e hatete katak, la simu nia rekursu, desizaun ne’e mai duni husi Juis nain tolu ne’ebe kondena nia iha akordaun ida primeiru, ho situasaun refere nia konteksta katak, desizaun ne’e labele simu tanba juis sira ne’ebe hamonu tiha ona sentensa ba nia antes mak julga fali sira nia desizaun rasik. 

Nia konsidera juis nain tolu ne’e la imparsial, tanba sira labele julga sira nia an rasik, tanba antes ne’e advogadu sira husu iha rekursu ne’e katak, jugamentu ida ne’ebe atu halo pedidu ikus ne’e tenki ho koletivu ida ne’ebe kompostu husi juis sira seluk, ne’ebe laos sira nain tolu maibe realidade sira nain tolu maka asina nafatin akordaun ne’e desidi nafatin hodi endifere prdidu advogadu nian no prosesu ne’ebe Tribunal halo ba nia kazu la fo oportunidade ba nia hanesan sidadaun ida atu defende an iha Tribunal. 

“Ida ne’e mak justu ba imparsial desizaun tribunal nian sira hakarak kondena deit hau, rona de’it akuzasaun la fo liu atensaun ba defeza ne’ebe maka hau nia defeza sira halo, hau la hetan oportunidade atu defende hau nia an ba krime ida ne’ebe tribunal rasik hamonu sentensa ba partisiasaun ekonomika negosiu,” nia dehan. 

Lucia tenik tan katak, mezmu desizaun ne’e sai ona maibe nia advogadu sira finaliza rekursu ida bad uni akordaun Tribunal nian, tanba tuir lei kuandu juis nain tolu ne’e maka buka nafatin akordaun nee tenke nulu, ho rajaun juis nain tolu labele julga fali sira nia an rasik, nia haktuir razaun ne’ebe nia protesta la signifika katak nia lakohi tama prizaun, maibe nia hakarak desizaun tribunal neebe liu husi julgamentu ida ne’ebe justu ho imparsial. “ohin hau sei hein to’o agora Tribunal distritu seidauk notifika hau atu ba prizaun, kuandu Tribunal Distrital notifika hau, hau nia advogadu sira sei atende hau sai mak sira sei halo,” nia esklarese.

Lucia mos prepara ona qexa ida atu haruka ba komisariu Direitu Umanus iha Nasoens Unidas, atu nia bele hetan protesaun ba direitu ne’ebe fundamental no direitu ba julgamentu ne’ebe justu hodi garante justisa ba ema hotu.

,