“Laiha Vaga Ba Eis Empregadu UNMIT”

.

Jornal Timor Post - Kinta-feira, 10 Janeiru 2013 

Prezidenti Komisaun Funsaun Publiku (KFP), Liborio Pereira hateten, eis empregadu The United Nations Integrated Mission in East Timor (UNMIT) hamutuk nain 80 ne’ebe hakarak sai funsionariu publiku tenke konkore vagas ne’ebe fo sai. 

 “Hau fiar katak, sira (eis funsionariu UNMIT) iha matenek badaen no iha esperensia maka’as tebes iha nivel internasional hanesan balun koalia lian Inglesh, Japones, China, Portugues no lian Koreanu, ho esperensia hirak ne’e hau fiar katak, sira konkore mak sai manan,” Liborio Pereira ba Jornalista sira iha nia servisu fatin, Kolmera, Dili, Kuarta (09/01). 

Relasiona ho misaun UNMIT nian ne’ebe remata iha Dezembru 2012, KFP iha vagas husi Ministeriu no Sekretariu Estadu sira tuir lei orsamentu Jeral estadu 2013 nian. 

Ho ida ne’e, ba eis funsionariu UNMIT ne’ebe iha interese ba konkore vagas hanesan kandidatu baibain, nune’e bele sai funsionariu publiku. Nia hatutan tan katak, regras KFP loke vagas ba publiku hotu, tan ne’e, la garante atu fo vagas espesial ba eis funsionariu UNMIT nian ne’e sei la akontese. 

Maske nune’e, bainhira husu kona-ba vagas hira mak KFP sei aplika iha 2013, Liborio dehan, rekrutamentu bazeia ba proposta orsamentu tinan foun nian neebe sei dekuti loron 4 fulan Fevereiru agora husi Ministeriu sira iha PN. 

Entertantu, antes ne’e, Xefi UNMIT Finn Reske Nielson husu ba estadu ho Governu Timor Leste atu asegura kampu servisu ba joven sira nia futuru nasaun ne’e. 

Finn Reske hato preokupasaun ne’e relasiona ho mandatu ONU nian ne’ebe remata ona iha fulan Dezembru tinan kotuk, ba oin estadu Timor Leste tenke fo perioridade maka’as ba foin sa’e sira hodi bele asegura dezenvolvimentu ho justu. 

.