“Kazu Emilia Submete Ona Ba Investigasaun”

.

Jornal Timor Post - Tersa-feira, 08 Janeiru 2013 

Ministeriu Publiku halo ona investigasaun ba kazu Ministra Finansas Emilia Pires ne’ebe deskonfia fo projetu ba nia kaben Warren hodi sosa ekipamentus Hospital Nasional Guido Valadares (HNGV) Bidau-Dili. 

Tuir informasaun ne’ebe diariu ne’e asesu iha Parlamentu Nasional, oras ne’e dadaun kazu Emilia Pires iha ona Ministeriu Publiku hodi submete ba prosesu investigasaun. 

Deputada Carmelita Moniz husi Bancada CNRT hateten, karik komisaun Anti Korupsaun (KAK) submete ona sira nia rezultadu investigasaun ba Ministeriu Publiku, sira nia kompetensia. 

Nia dehan, hanesan ema politika ida husi partidu ne’ebe maioria iha Parlamentu Nasional sempre suporta instituisaun hotu-hotu bainhira hala’o kna’ar no kompetensia tuir konstituisaun ka lei ne’ebe iha no regras hotu-hotu ne’ebe aplika iha Timor Leste. 

“Ami nia partidu maioria maibe ami la haree, tanba Emilia Pires ne’e La’os ema CNRT, nia ema independenti, se nia ema CNRT bainhira faktus hatudu nia halo iregularidade nia tenki toma responsablidade ba nia hahalok hodi ba prosesu iha Tribunal tuir lei ne’ebe vigora iha Timor,” dehan Moniz ba Jornalista, segunda (07/01) iha uma fukun PN. 

Nia mos hatutan tan, husu ba instituisaun kompotente labele akuza ema ida ho interese politika, ida ne’e la loos, akuza ema ida tenki ho faktus loloos. 

“Ita hotu-hotu hakarak halakon KKN iha rai laran, ne’e virus aat ida ne’ebe atu halo kiak nasaun ne’e, maibe, tenki lao tuir nia dalan, labele uza ita nia poder ba iha interese politika,” nia realsa. 

Tuir publikasaun Jornal balun iha tinan kotuk, husi entervista ho Diretora HNGV Odete da Silva Viegas katak, karta pedidu ho numeru ref. 130/adm/HNGV/III/2012, ne’ebe diretora hato’o ba esi Vise Ministra Saude Madalena Hanjan la husu kona-ba ekipamentus ne’ebe fornese husi kompania Mac’s Metalcraft Pty Ltd na’in husi Warren Macleod kaben (Ministra Finansas, Emilia Pires). 

Publikasaun ne’e hatutan, pedidu ba eis Vice Ministra Saude Madalena Hanjan iha loron 22 Marsu 2012 husu atu hala’o kompras urjente ba ekipamentus mediku nian ne’ebe iha relasaun ho servisu Unidade Haemodialisa maka hanesan Haemodialisa unidade 2, kama set unidade rua, no material konsumaveis ne’ebe iha relasaun ho serbisu Haemodilisa nian. 

Tuir lista aneksu ne’ebe asina husi Diretor Nasional NALA, Leoa Borges, S. Sos. MPH, Xefi Departementu de jestaun de Ekipamentu Medika, Avelino Afornso Brites ho Eis Vise Mintara saude, Madalena F.N.H. Costa Soares Bsn ne’e propois orsamentu ho total U$2,004,100.00 hodi fornese item 17 ba ospital no sentru saude sira. 

Maibe, bainhira pedidu ne’e haruka ba Ministra Finansas Emilia Pires dekreta hahu husi item numeru dahuluk to’o numeru lima mesak sasan ne’ebe fornese husi Kompania Mac’s Metalcraft. 

 Husi aktu ne’e, publikasaun Jornal refere dehan, aktu ne’e deskonfia Emilia Pires viola ona dekretu Lei Numeru 10/2005, rejime Juridiku ba aprovizionamentu, kapitulu IV inkontabilidade iha Artigu 32 ne’ebe regula kona-ba konflitu de interese servidor estadu sira nian.

.