Kareta Ba Deputadu PN: “Body Prado Mesin Hilux”

,

Jornal Independente - Kuarta-feira, 23 Janeiru 2013 

Deskonfia kareta ho marka prado 66 ne’ebe mak estadu sosa hodi oferese ba deputadu sira iha Parlamentu Nasional la’os Prado lolos, tanba kareta marka Prado maibe nia motor (mesin) Hilux. 

Entertantu Sekretariu Jeral Parlamentu Nasional Rui amaral dehan, dokumentu garantia (garansi) no sertifikadu inspeksaun kona ba kareta nian simu hotu ona. 

Kona ba marka motor (mesin) Hilux fali ne’e, dehan nia, ne’e responsablidade kompania Auto Timor mak bele esplika, iha loron hanesan diretor kompania Autor Timor laiha tempu atu koalia ho media, so hateten tuir deit ba nia sekretaria katak, dokumentus hotu inrega ona mos ba Sekretariu jeral PN nian. 

Kareta Prado ne’e sai polimika iha PN, kareta ne’e kompania Auto Timor mak manan tender hodi sosa husi jepaun ho folin kada kareta mill $63 dollar Amerika. 

Entertantu, membru komisaun E trata asuntu Infraestrutura, Transporte no Telekomunikasaun, Deputadu Inacio Moreira deskobre kareta ne’e marka Prado maibe nia mesin ne’e uza mesin kareta Hilux nian. 

“Kareta sira to’o ona intrega ona, haree ba haree mai ninia body prado duni mais ninia mesin ne’e deskonfia enzin ida Hilux figu nian, 4 DL,” dehan Inacio horseik iha Parlamentu Nasional. Inacio ezije atu governu no kompania esplika tanba bainhira Parlamentu aprova politika sosa kareta ne’e katak, sosa kareta Prado mesin mos Prado. 

 “Ami hakarak husu uluk espesifikasaun ba kompania ne’ebe mai hatama mai ne’e, kareta ne’e prado ka ninia enzin ne’e Hilux ninian tenki loos,” dehan Inacio. Inacio dehan, se kareta ne’e prado nia mesin Hilux entaun fo duvida boot ba publiku tanba kareta ne’e folin karun maibe nia mesin Hilux nia fali. Inacio ne’ebe iha ofisina kareta ne’e dehan, kareta marka Prado agora nia folin iha merkadu mill $58 maibe tanba sa mak Parlamentu sosa ho folin mill 63. 

“Hau hatene desizaun ne’ebe foti kareta ida ho folin $63 mill marka Prado, kartea prado sira ne’ebe kompania privado sira fa’an Prado lolos $58 mill,” dehan Inacio. 

Tuir Inacio, se kareta marka Prado maibe nia mesin Hilux entaun nia folin la to’o $63 mill tanba, ne’e laos mesin orjinal prado nian. 

“Se ita dehan ezin (mesin) Hilux ne’e provolta menus $40 mill (iha Indonezia) to’o mai iha ne’e (TL) pruvolta $45 mill hanesan ne’e, agora tanba saida mak nia presu ne’e to’o $63 mill,” dehan Inacio. 

Entertantu, Deputadu Pedro da Costa husi bancada CNRT hateten, presiza halo investigasaun tanba Parlamentu aprova osan atu sosa kareta ho marka prado no nia mesin mos tenki prado nian, la’os Hilux. Entertantu, sekretariu jeral Parlamentu Nasional Rui Amaral hateten, dokumentu garantia (garansi) no sertifikadu inspeksaun ne’ebe nia simu hateten katak, kartea sira ne’e prado. 

“Nia kareta ne’e nia motor mesin tau vidro, atu tau fali Nisan ninia ka, haul abele esplika ida ne’e tanba ne’e fabrika mak bele esplika,” dehan Rui. Tanba ne’e, Rui dehan, so kompania Auto Timor maka bele esplika konaba ida ne’e, tanba dokumentus orijinal ne’ebe mak nia simu kareta mak ida ne’e duni. Rui pronto atu simu investigasaun husi parte ne’ebe deit karik duvida KKN ruma. 

Kareta hamutuk 66 ne’ebe PN sosa, Rui dehan, iha kartea marka prado 6 ba meja PN nia tenderijasaun halo ketak, kada kareta ida ho osan $64 resin no hamutuk $389 mill (Trezentus oitenta nove mill). Maibe, kareta 66 ho marka hanesan, nia tenderizasaun halo ketak ho folin kada kareta ida U$63 mill.

,