Husu PM Xanana Halo Remodelasaun “Carrascalao Rekoinese Vizaun Mari Alkatiri Ba Timor”

.

Jornal Timor Post - Kuarta-feira, 09 Janeiru 2013 

Haree ba realidade membru Governu balun laiha kapasidade, ema politiku sira hamosu hanoin oinsa Primeiru Ministru Kay Rala xanana Gusmao uza kompetensia atu halo remodelasaun ba estrutura Governu Bloku Koligasaun. 

Tuir Eis Vise Primeiru Ministru ba asuntu administrasaun iha IV Governu, Mario carrascalao hateten, atu halo remodelasaun prsiza iha akordu hodi involve opozisaun, maibe, iha ninia observasaun, Partidu maioria Congresu Nasional Rekonstrusaun Timor Leste (CNRT) laiha vontade atu simu opozisaun. 

“Iha parte seluk ita haree katak ema barak kompotente iha UDT, FRETILIN, PSD no ASDT iha ema barak, ida ne’e la signifika katak ema sira ne’e atu tama hotu, mais presiza haree ema ne’ebe iha kapasidade,” dehan nia ba Timor Post, Tersa (08/1) iha Hotel Timor, Dili. 

Nia dehan, se hakarak remodelasaun tenki kria plataforma de intendementu ida katak, bele iha diferensia politika maibe tau perioridade ba kestaun nasional, hanesan kestaun mina, ema hotu tenki konkorda katak maid uni Timor-Leste, nune’e mos atu redus korupsaun, opozisaun ho maioria tenki apoiu. 

 “Hau hanoin opozisaun tenki pronto, hau haree ema hanesan, Mari Alkatiri nia vizaun mos kapas ba Timor, hau mos la fiar opozisaun atu simu remodelasaun atu servisu hamutuk ho Ministru ne’ebe la dun mos iha nia servisu, tanba sira lakohi hafoer FRETILIN nia naran,” Carrascalao komenta. 

Carrascalao mos rekonese, Timor Leste iha mestradu barak maibe presiza ema ne’ebe hatudu ona prestasaun servisu diak ba nasaun Timor Leste, labele hili de’it ema ne’ebe oin kapaas depois halo servisu lahatene, ne’e la diak. 

Nia realsa tan, lider balun ne’ebe ka’er ukun iha IV Governu Konstitusional la merese tur tan iha kadeira V Governu, tanba sira ne’ebe tur iha estrutura Governu bloku koligasaun hatudu ona prestasaun servisu iha tempu pasadu. 

Eis Governador iha tempo Indoenzia ne’e hatutan, membru governu sira balun presiza halo estudu komparativus ba rai seluk hanesan Vabo-Verde, nasaun ne’e laiha riku hanesan Timor maibe hetan osan husi imigrante, osan ne’e mak sira aproveita ho diak, entaun Timor Leste presiza estudu hodi haree esperensia husi nasaun ne’e. 

Nia dehan, Governu anterior la’o ho impunidade katak, ema ne’ebe halo sala ki’ik la hetan kastigu entaun nia kontinua halo nafatin, tanba se governu hakarak hamoos korupsaun, tenki hamoos husi ki’ik to’o boot. 

 “Uluk iha IV Governu Konstitusional ha’u rasik hatene sira nia pasadu katak, ema ne’ebe tuir loloos labele tur iha governu aora, mais, hau la hatene ho tempu agora bele muda ona sira nia hahalok karik, ha’u hanoin kuandu ita halo sala ruma iha ita nia uma rasik entaun ba vizinhu nia uma mos ita sei halo nafatin,” afirma Carrascalao.

.