“Governu TL – Australia La Seriu Negosia Greater Sunrise”

.

Jornal Nacional Diario - Sesta-Feira, 11 Janeiru 2013 

Bankada Partidu Opozisaun FRETILIN konsidera, Governu Timor Leste ho Australia la seriu halo negosiasaun ba kampo Mina Greater Sunrise tamba to’o agora ne’e seidauk iha akordu ida. 

Deputadu opozisaun FRETILIN, Estanislau Aleixo da Silva hatete informasaun neebe FRETILIN hetan to’o agora seidauk iha negosiasaun ne’ebe seriu entre parte rua ne’ebe involvidu, tanba ne’e, FRETILIN espera katak iha tinan foun ida ne’e governu bele hetan solusaun diak hodi rejolve Greater Sunrise. 

“Esforsu Governu nian husi Governu AMP (Alianca Maioria Parlamentar) to’o mai Governu ida agora ne’e (Bloku Koligasaun), koalia dehan katak dada mai, maibe to’o agora seidauk mai, no to’o agora seidauk iha tan akordu ida, negosiasaun mos seidauk lao diak,” sublinha Estanislau da Silva, Kinta (10/01) iha Parlamentu Nasional. 

Deputadu husi Bancada FRETILIN ne’e konsidera Pipeline Greater Sunrise (GS) seidauk iha posiblidade atu mai Timor Leste tanba seidauk iha akordu ida. Nia hatutan tan katak, governu agora ne’e tenki haree oinsa mak atu kontinua akordu ida ne’e para TL labele lakon, tanba akordu ne’e TL konsege hetan 50% ona. 

Akordu ne’ebe governu anterior asina ho Australia ne’e remata iha tinan 2013 ne’e, tan ne’e, governu tenki haree oinsa maka atu renova akordu ida ne’e no oinsa mak atu halo negosiasaun hodi dada greater sunrise ne’e mai Timor Leste, ida ne’e Governu ne’ebe ukun sira mak tenki haree no hanoin didiak kazu ida ne’e. 

Nia akresenta, Timor Leste presiza duni atu lori Pipeline Greater Sunrise mai Timor Leste, hodi halo dezenvolvimentu iha rai laran. 

.