“Governu Sei Sosa Kilat Foun Ba F-FDTL”

.

Jornal Timor Post - Segunda-feira, 14 Janeiru 2013 

Governu komesa foti ona desizaun hodi sosa tan kilat ba instituisaun FALINTIL-Forsa Defeza Timor-Leste (F-FDTL), hodi troka kilat tuan ne’ebe durante ne’e iha instituisaun F-FDTL. 

Sekretariu Estadu Defeza (SED), Julio Tomas Pinto, ba Jornalista sira informa, governu iha ona desizaun hodi sosa kilat ba iha instituisaun F-FDTL iha tinan 2013 nia laran. 

“Agora sosa kilat ne’e ninia prosesu lao hela, mais hau la kohi esplika prosesu ida ne’e, tanba ida ne’e halo nusa mak ita ba esplika fali iha publiku, mais tinan ida ne’e kilat mai ona, troka ita nia kilat sira ne’ebe tuan ona,” dehan SED, Julio Thomas Pinto, iha Palasiu Governu foin lalais ne’e. nia dehan, kilat ne’ebe governu hanoin atu sosa ba iha instituisaun F-FDTL la’os buat ida ne’ebe fasil hanesan sosa ropa iha loza, maibe sei liu husi prosedimentu. 

“Ita tenki hatene sosa kilat ne’e laos buat bai-bain, tanba ninia prosedimentu naruk,” tenik Julio Thomas Pinto. Ho ida ne’e Julio dehan, nia parte lakohi infrma ba publiku hanesan instituisaun seluk nian ne’ebe sosa kilat tenki publika atu ema hotu hatene kilat ne’ebe sei sosa. 

“Hau lakohi esplika hanesan instituisaun sira seluk, atu esplika prosesu kilat no modelu kilat ne’e hotu,” hateten SED Julio Thomas. Nia dehan, prosesu sosa kilat ne’e lao hela no governu serviso hamutuk ho nasaun sira ne’ebe merese atu bele supay kilat mai iha Timor Leste. 

 “Agora karta ida mai tiha ona atu F-FDTL bele ba haree kilat ne’ebe ita atu sosa , hau lakohi esplika detaillu ba publiku, maibe hau fiar katak kilat ne’e sei to’o,” dehan nia. Maski nune’e, Julio Thomas Pinto mos lakohi esplika kona ba tipu kilat no kuantidade kilat ne’ebe sei sosa no husi nasaun ne’ebe, maibe kilat ne’e sei sosa iha tinan 2013. 

,