Governu Mobiliza Povu Limpeza Jeral “FRETILIN Konsidera Politika Kosmetika”

.

Jornal Nacional Diario - Sesta-Feira, 11 Janeiru 2013 

Kintu (V) Governu konstitusional Sesta (11/01) ohin, mobiliza povu, funsionariu publiku, instituisaun F-FDTL, PNTL no Estudantes sira hodi limpeza Jeral iha Timor laran tomak, li-liu kapital Dili. 

Esforsu Governu nian ba limpeza Jeral ne’e partidu opozisaun FRETILIN konsidera hanesan politika kosmetika Kintu Governu Konstitusional nian. 

“Limpeza Jeral ne’ebe mak iha Politika Kospetika de’it, atu hatudu ba povu ita halao servisu maibe laos hanesan ne’e, ukun nasaun uza povu nia fiar no povu nia osan nebe ita hetan atu halo planu no politika buka solusaun,” dehan Joaquim dos santos ba Jornalista Kinta (10/01) iha Parlamentu Nasional. 

 Nia hatutan, fiar ne’ebe mak povu fo ba atu ukun nasaun halo politika hodi buka solusaun nebe konkretu ba problema ne’ebe povu hasoru iha terenu, laos halo politika kosmetika ne’ebe mak oras ne’e dadaun Governu sira hala’o.

 Nune’e mos Deputadu Aurelio Freitas husi Bancada FRETILIN hateten katak, programa limpeza jeral ne’ebe MAEOT trasa, ne’e hanesan programa hakfodak tamba mosu inundasaun iha kapital Dili. 

“Problema mosu mak ita foin gakfodak hodi halao limpeza jeral, loloos ne’e ita prepara buat hotu antes ladiak ne’e mosu, tanba governu laiha planu ba programa hamoos foer iha sidade laran,” esplika Aurelio. 

Nia hatutan inundasaun nebe mosu iha kapital Dili laos foin mak akontese, maibe kada tinan sempre akontese, maibe Dili ne’ebe sai kapital nasaun ninian mak hanesan nune’e nafatin, tanba governu laiha programa ida ne’ebe mak diak.

.