“FRETILIN Pesimista Ho OJE 2013”

.

Jornal Independente - Tersa-feira, 08 Janeiru 2013 

Bancada Opozisaun iha Parlamentu Nasional Pesimista ho orsamentu jeral Estadu 2013 tanba fo perioridade liu ba projeitu bo’ot ne’ebe mak sei benefisia ema grupu elite sira. 

Deputdau Francisco Branco husi bancada FRETILIN ne’e hateten, OJE 2013 ho montante bilaun 1.7 dollar Amerikanu ne’e sei Benefisia grupu elitu deit, tanba osan ne’e fo perioridade ba infra-estrutura ho projeitu ne’ebe boot de’it. 

“Infra-estrutura buat ne’ebe mak ita halo permanente duni, labele buat hotu-hotu ira responde ho emerjensia depois nia rejultadu mos emerjensia hotu de’it,” dehan Branco ba Jornalista sira iha PN horseik. 

TL nu’udar nasaun sub dezenvolvidu, Branco dehan, tenki investe maka’as iha area agrikultura, saude no edukasaun, ho infra-estrutura ne’ebe mak dura duni, la’os emerjensia. Iha area rekursu umanu, Branco dehan, Governu kria fundu ba kapital umanu maibe ida sei la rejolve problema ne’ebe TL agora infrenta tanba tuir nia investe iha rekursu umanu tenki hahu investe kedas iha eskola infantile to’o superior. 

Branco mos dehan, orsamentu Jeral 2013 sei la redus pobreja iha rai laran, tanba governu tau perioridade ba projeitu boot de’it ne’ebe sei fo vantazen ba ema estranjeiru. 

Ejemplu nia dehan, hanesan projetu MDG harii uma lima kada aldeia, fo benefisiu ba ema estranjeiru tanba material hotu fabrikadu no ema estranjeiru mak servisu. 

 “Orsamentu jeral Estadu 2013 tama tarde la tuir praju ne’ebe mak estabilisidu tiha ona katak, lolos proposta OJE 2013 tama iha fulan outubru 2012, tuir regra lei orsamentu jeral estadu nian,” dehan Branco ba Jornalista sira iha PN horseik. 

.