“FRETILIN Hirus Kompania Selebriti Kaer Projeiru”

.

Jornal Independente - Sesta-Feira, 11 Janeiru 2013 

Bancada FRETILIN Iha uma fukun Parlamentu Nasional (PN) kritika maka’as governu kona ba projeitu Ponte kiik iha Palacio Prezidenti nia oin ne’ebe fulan lima ona seidauk remata. 

Deputadu Inacio Moreira kritika tanba konsidera projeitu ne’e kaer husi kompania selebriti ne’ebe prestasaun la dun diak. 

 “Hau haree kompania ida ne’ebe halo ne’e hanesan selibriti, hau la hatene, tamba loro-loron sai iha Televizaun iha nasaun seluk,” dehan Inacio iha PN (10/1) bainhira hala’o audensia ho Ministeriu Finansas. 

Inacio kritika tanba, konstrusaun Ponte kiik ne’e tarde liu ona, halo kareta ingarafamentu (Macet beibeik). Inacio dehan tan, moe boot ba estadu ida ne’e tanba deit ponte ne’e seidauk hotu implika kareta ingarafamentu halo Primeiru Ministru Xanana Gusmao tun hodi manda kareta iha loron hirak liuba. 

 “Ita boot sira lamoe Primeiru Ministru tun iha neeba manda kareta, tanba deit kompania nia hahalok la diak, moe boot ba estadu ida ne’e.,” dehan Inacio. 

 Inacio Eziji ba Governu atu haka’as kompania sira ne’ebe mak hetan fiar husi governu tenki iha responsablidade. Ba kestaun ne’e, Deputadu husi CNRT Aderito Hugo rekoinese katak, projeitu ne’e tarde tanba kompania mak manda fali governu ne’ebe nain ba projeitu. 

 “Emprezariu sira halo tuir sira nia hakarak depois mai ita halo tuir fali, ita iha emprezariu preman mos iha, emprezariu broker mos iha,” dehan Hugo. 

.