“Forsa Bataliaun Ida Hala’o Ezersisiu Cobra Iha Fatuberliu”

.

Jornal Independente - Tersa-Feira, 22 Janeiru 2013 

Membru F-FDTL hamutuk bataliaun ida desloka ona ba Sub-Distritu fatuberliu hodi hala’o ezersisiu Cobra durante semana rua. Vise Xefi estadu Maior F-FDTL, Brigadeiru Jeneral, Filomeno Paixao hatete, kada tinan F-FDTL halo ezersisiu ida, laos operasaun, Exersisiu ne’e atu hadiak liu tan sistema treinamentu ba Forsa sira hotu. 

Alinede ne’e, atu teste kapasidade F-FDTL nian iha planeamentu, operasaun no iha taktiku militar inklui halo avaliasaun hodi bele identifika failansu balun ne’ebe sei existe iha instituisaun F-FDTL nian. 

“Ne’e laiha situasaun ameasa no instabilidade, portantu ida ne’e exersisiu normal, kuandu temi ona operasaun ne’e iha desizaun Prezidenti ka nasaun hasoru krize ona, exersisiu ne’e atu koko deit ita nia kapasidade treinamentu iha komandu no asuntu seluk,” hateten paixao ba Jornalista iha Kuartel jeral F-FDTL, segunda (21/01). 

Nia dehan, ezersisiu ne’e, membru F-FDTL sei halo kordinasaun diak ho populasaun tomak inklui PNTL no autoridade lokal iha fatin ne’ebe sira atu halo ezersisiu. 

“Ami halo ezersisiu ne’e durante semana rua, maibe bele aumenta depende ba diretiva husi governu, hau dehan ezersisiu ne’e diferente ho operasaun, ami laos ba halo operasaun hasoru CPD-RDTL, maibe ida ne’e atu hala’o ezersisiu iha fatuberliu,” nia hateten. 

Kona ba konsentrasaun massa CPD-RDTL iha sub Distritu fatuberliu, Distritu manufahi, tuir Paixao presiza desizaun politika mak foin halo atuasaun, wainhira seidauk iha desizaun ruma husi parte governu, labele halo atuasaun. 

“Kuandu diretiva desidi halo ezersisiu, ami halo, kuandu dehan nakfila ba operasaun ami tenki halo operasaun, maibe ida ne’e tama ba ezersisiu,” nia hateten. Kona ba Prejensa CPD-RDTL iha Fatuberliu, Perte seguransa hateten katak, Komando jeral Polisia Nasional Timor Leste (PNTL) oras ne’e sei halo diskusaun klean ho Ministeriu defeza no seguransa atu halao intervensaun CPD-RDTL iha distritu Manufahi ne’ebe deskonfia hatauk komunidade sira iha fatin neeba. 

Adjuntu Komandante PNTL, Komisariu Afonso de Jesus hateten, diskusaun kona ba asuntu ne’e sei lao hela no seidauk hetan autorizasaun ruma husi Ministeriu Defeza no Seguransa. “ida ne’e ami sei deskute hela hodi bele hetan desizaun ruma,” dehan Afonso. 

Nune’e, antes ne’e, deputadu Bancada CNRT, Arao Noe de Jesus hakilar maka’as kona ba movimentu CPD-RDTL nian ne’ebe deskonfia hadau komunidade nia to’os, no mos kasa sira nia animal sira inklui hatauk komunidade balun iha Sub Distritu Fatuberliu, Distritu Manufahi.

.