Foos MTCI Fa’an Karun “Sosiedade Sivil Fo Kulpa Ba Governu No PN”

.

Jornal Nacional Diario - Segunda - Feira, 21 Janeiru 2013

Folin Fos governu marka Ministeriu Comersia Industria Ambiente (MCIA) ne’ebe ho kilo 25 ho folin U$12.00 kada saku, dadaun ne’e folin sa’e ba U$18 halo povu laiha kbiit atu sosa.

Folin foos ne’ebe aas ne’e, Sosiedade sivil fo kulpa ba governu no parlamentu Nasional tanba la kontrola folin sasan sira ne’e iha merkado. “Folin foos agora ne’e kulpa MCIA ninian maibe kulpa mos membru Parlamentu Nasional sira, tanba sira nunka halo intevensaun ka fiskalizasaun,” deklara Diretur ONG Luta hamutuk Mericio Akara ba JNDiario iha nia kna’ar fatin, farol, Dili relasiona ho foos folin ne’ebe dadaun ne’e sa’e maka’as.

Nia hatutan folin foos sa’e ne’e halo povu laiha kbiit atu sosa, ne’e governu tenke interven no parlamentu mos tenki tun halo fiskalizasaun tanba sira mak sai matan, ibun no tilun povu ninian.

 “Folin foos sa’e ida ne’e hatudu halo hanesan beban dala ida tan ba ita nia populasaun sira, ida ne’e hatudu katak governu la dun iha responsablidade, ladun iha sentimentu de krize, la dun iha solidaridade ba nia populasaun rasik tanba la konsege kontrola folin foos tuir populasaun ninian kapasidade ne’e, i lolos ne’e PN tenki tun direta (turun tanga) ona, tanba sira mak tilun , matan no ibun populasaun nian, tamba ita haree katak populasaun laiha kapasidade atu hola foos karon ida, membru Parlamentu tenki koalia maka’s iha PN hodi husu ministru ne’e klarifika no esplika,” dehan Mericio Akara.

,