Fernando La-Sama “Governu Sei Sobu Uma Iha Baleta Ninin”

.

Jornal Timor Post - Sabadu, 12 Janeiru 2013 

Vice Primeiru Ministru Fernando La-Sama de Araujo husu ba komunidade sira ne’ebe hela iha mota ninin no Baleta ninin liuliu iha arte Kaikoli atu sobu rasik sira nia uma, se lae governu mak sei ba sobu. 

“Diak liu agora kedas hola inisiativa rasik sobu tia uma sira ne’e muda ba fatin dook, duke governu liu husi administrasaun Dili nian mak sobu,” afirma La-sama ba Jornalista sira,” Sesta (11/1), wainhira partisipa limpeza jeral iha Parte Kaikoli, Dili. La-Sama hateten, halo uma iha baleta leten depois so’e foer iha baleta laran, kuandu iha tempu udan sulan be metin no estraga ema barak nia interese. 

“Hau sei la tolera ema ida, sobu sira nia uma laiha kompensasaun tamba uma ne’ebe halo iha baleta leten fo impaktu ba ema seluk,” hateten La-Sama. 

La-Sama gamutuk ho funsionariu publiku husi Ministeriu hotu no komunidade sira, sesta (10/1) hahu tuku 07:00 Otl, hala’o limpeza jeral iha sidade Dili, La-sama hamutuk ho nia grupu hahu husi Merkadu Lama besik to’o balide Rai-Hun. 

Hafoin limpeza, La-Sama husu atu komunidade hotu iha Dili tenki iha ona konsensia atu soe foer iha foer fatin, nia husu, loro-loron ema ida-idak tenki hamoos foer ne’ebe iha, hahuu husi uma laran to’o fatin publiku.

,