Estanislau da Silva “Governu La Seriu Negosia Greater Sunrise”

.

Jornal Independente - Tersa-feira, 08 Janeiru 2013 

Deputadu Estanislau da Silva husi bancada FRETILIN konsidera Governu la seriu halo negosiasaun ho kompania Woodside no governu Australia hodi dada kdoras mai Timor-Leste. 

Estanislao kritika governu ne’ebe mak lidera husi PM xanana Gusmao tanba durante ne’e hakilar dehan kadoras Greater Sunrise mai TL maibe iha realidade distinu Greater Sunrise seidauk hatene bainhira mak kadoras Greater Sunrise mai TL. 

Lider opozisaun ne’e ezizi atu governu ne’ebe mak iha responsablidade ba halo negosiasaun tenki seriu tanba akordu Greater sunrise sei mate iha fulan oin. “Hau hanoin Governu ne’ebe kaer ukun sira tenki haree oinsa mak atu kontinua hare fila akordu ida ne’e, para ita bele lakon,” dehan Estanislau iha PN horseik. 

Akordu ne’ebe mak agora iha katak, esplorasaun mina no Gas iha Greater Sunrise TL no Australia sei fahe hanesan katak 50%. Tanba ne’e, Estanislau husu governu mos tenki kuidadu atu deside akordu ne’e kontinua ou hamate tanba bele fo vantazen no dezvantazen ba TL. 

Nia hatuir tan, se distinu Greater Sunrise seidauk hatene, TL dependensia ba bayu Undan bele fo impaktu ba orsamentu Jeral Estadu iha futuru, tanba TL to’o ohin loron sei depende mesak ba fundu minarai. 

“Se ita kontinua nafatin hanesan ne’e, hanesan pezu boot ida ba ita nia fundu mina rai, oinsa mak bele hatama fali osan para fundu mina rai ne’e bele gasta hotu, ita laos riku, ita nia mina rai ne’e la barak, oituan deit, oinsa mak ita gasta osan ne’e ho kuidadu par abele benefisia ba ema hotu,” dehan Estanislau. 

,