“Emprezariu Fasilita Membru Governu Sai Koruptor”

.

Jornal Timor Post - Kinta-feira, 10 Janeiru 2013 

Eis Vise Primeiru Ministru Asuntu Administrasaun Mario Carrascalao hateten, emprezariu Timor-oan balun mos fasilita membru governu sira atu sai koruptu. 

Nia dehan, nu’udar Timor oan fo buat ruma ba malu maka la simu mos sala, mais tenki aviza kedas,” hau simu maibe kondisaun mak ita boot sira labele hein favor mai husi hau tanba lei la favorese,” nia kompara. 

“Hau haree emprezariu balun fasilita ita nia membru governu atu sai koruptu, tuir loloos labele, dala barak ita nia media nasional sira levanta problema korupsaun mais nunka iha investigasaun,” dehan nia ba Timor Post, foin lalais ne’e iha Hotel Timor. 

Bazeia ba Carrascalao nia observasaun iha V Governu konstitusional so iha de’it membru governu, Sekretariu Estadu Formasaun Profesional e Empregu deit mak deklara rikusoin ba publiku, maibe membru governu balun lahatene halo ka lae. 

Nia dehan, altura IV governu konstitusional nia halo estratejia atu halo prevensaun ba korupsaun, nunka iha Ministru ida mak apoia, maibe iha estranjeiru ne’e hateten, bens ne’ebe ministru sira nian tenki rejistu hotu. 

Tan ne’e, se governu hakarak hamoos korupsaun agora tenki hahu kedas husi korupsaun ki’ik to’o boot, labele dasa de’it korupsaun kiik no korupsaun boot sira husik hela. 

 “Ema lakohi ita atu hal saida, ema ida deit mak hakarak luta kontra korupsaun ne’e hau hanoin inposivel, KAK deit nia servisu la’o tinan tolu ona, mais ita lahatene kazu hira mak KAK lori ba Tribunal,” nia hatutan tan.

.