“Emilia Prontu Hatan Iha Tribunal”

.

Jornal Timor Post - Sesta-Feira, 11 Janeiru 2013 

Ministra Finansas Emilia Pires hateten, nia parte pronto ba hata’an iha Tribunal ba kazu alegasaun ne’ebe hateten nia fo projeitu ba nia la’en. 

Emilia hateten, alegasaun ba nia la’o novidade foun, tan hahu kedas husi tempu governu anterior to’o agora, nia an sempre simu alegasaun oi-oin, maibe realidade laiha faktus. 

“Hau sei la halo komentariu barak, tempu antigu mos sira akuza hau, tan ne’e, hau pronto ba hatan iha Tribunal,” Emilia Pires dehan ba Jornalista sira iha Tower, Fatuhada, Kuarta (09/01), bainhira partisipa inkontru kona-ba orsamentu jeral estadu 2013. 

 Emilia tenki, se karik kazu alegasaun dun nia fo projeitu ba nia laen iha ona prosesu laran, nia parte pronto atu submete ba justica, tanba tuir nia laiha ema ida mak sees husi lei nia oin, no boot liu fali lei. 

Tuir informasaun kazu refere oras ne’e rejistu iha Ministeriu Publiku, maibe Ministra Financas Emilia Pires rasik to’o oras ne’e dadaun seidauk simu notifikasaun ruma husi instituisaun refere. 

Iha parte seluk, Deputadua husi bancada FRETILIN Francisco Miranda Branco katak, argumentu ne’ebe maka Ministra Financas Emilia Pires foin dadauk halo, ne’e hanesan defende an de’it. 

“Ita ida-idak sempre buka defende an, maibe ne’e nia direitu tomak, ita lalika kondena maibe, pratika ne’ebe husi desizaun hamosu projeitu ne’ebe alega Ministra fo projeitu ba nia laen, ne’e hatudu katak viola prosesu aprovizionamentu,” Branco hateten. 

.