Doadores Retira; “ONG Barak Taka Odamatan”

.

Jornal Timor Post - Segunda-Feira, 31 Dezembru 2012

Maioria ONG (Organizasaun Naun Govermental) ne’ebe eziste iha Timor-Leste sei taka odamatan kuandu doadores sira retira husi nasaun foun ida ne’e. 

Diretor Forum ONG Timor-Leste (FONGTIL) Arcenio Pereira hateten, tuir dadus ne’ebe mak nia hetan kuaze 348 ONG mak oras ne’e ejiste iha nasaun TL, maibe iha posiblidade ONG barak mak sei taka odamatan kuandu duadores sira retira ona husi Timor. 

“Dadus ida uluk hau la dun hatene klaru, maibe tuir informasaun ne’ebe mak hau rona katak, kuaze besik 600 ONG mak iha TL,” dehan Diretor FONGTIL Arcenio ba Timor Post (29/12) iha nia Edifisiu FONGTIL Kaikoli, Dili. 

Nia hatutan, iha posiblidade ONG barak mak sei muda sira nia politika ba fali kompania no balun mos sei taka odamatan tanba misaun UNMIT remata, duadores barak mos sei retira husi TL no ONG barak mak sei la hetan fundus. 

Ne’eduni husi inisiu kuandu ita koalia lolos kuaze 471 ONG internasional no nasional mak ejiste iha Timor, maibe depois FONGTIL halo fila fali general Meeting no konsege elemina ONG balun. 

Maibe FONGTIL mos kontinua loke dalan hodi simu fali ONG foun sira, purtantu husi total 348 ne’ebe mak eziste, sira ne’e mak FONGTIL haree katak, durante ne’e sai hanesan membru ativu, sira iha duni office rasik no kontinua opera iha TL. 

.