“Diskonfia ADN Halo Manipulasaun”

.

Jornal Timor Post - Sabadu, 05 Janeiru 2013

Emprezariu Timor oan sira deskonfia Ajensia Dezenvolvimentu Nasional (ADN) hala’o prosesu pagamentu ba Projetu 2012 nian iha manipulasaun, tanba selu la tuir pedidu ne’ebe sira hato’o. Ba Timor Post, Diretor Kompania Elvia Lda, Angelo de Jesus, husi Distritu Covalima, sesta (04/01), to’o iha edifisiu ADN-Dili, hidu husu klarifikasaun loloos husi ADN. 

“Tuir loos alokasaun orsan pagamentu ne’e montante U$126, ital maibe osan haruka de’it U$ 105,813 resin husi total orsamentu bazet U$221.380,52, ba projeitu konstrusaun edifisiu Medisina Nukleo Sub Distritu Fatululik, Distritu Covalima,” haktuir Angelo ba Jornalista Timor Post.

Nia haktuir, iha Covalima nia telefone ona ba ADN laiha rejultadu too nia to’o rasik atu hetan klarifikasaun loloos. “Iha dia 02 janeiru 2013, mai ceck osan iha BPA aloka osan la tuir servisu kompania sira nia servisu progresu ne’ebe atinji ona 81,13%, maibe osan ne’ebe aloka ba ne’e la pas ho progresu ne’e,” dehan nia. Nune’e, Angelo husu ba ADN atu labele koa nonok sira nia osan, maibe tenki selu bazeia ba pursentu progresu obra ne’ebe iha.

Nia esplika, konstrusaun edifisiu medisina Nukleo ne’ebe tuir termu kontratu ba komapnia iha fulan Agustu 2012-31 Dezembru 2012, maibe realidade ADN mos kontratu tarde. Tanba ne’e kompania sira la konsege finaliza projeitu sira iha fulan hat nia laran foin atinji 81%.

“Hau la preokupa ho osan adiatamentu 25% ne’e tarde maibe ami kompania rasik iha osan para atu jere hodi halao projeitu konstrusaun,” nia esklarese. Entertantu konfirma ba diretor Ajensia Dezenvolvimentu Nasional (ADN), Samuel Marcal hatan kona ba preokupasaun ne’e hateten, pedidu pagamentu ADN taka iha dia 17, tanba hare iha buat balun entaun fo deadline to’o dia 20 para simu hodi halao prosesu pagamentu agora sei kontinua.

Maibe halo pagamentu ne’e parte tezoru nia prosesu tomak atu bele finaliza dokumentus ne’ebe kompania sira hatama hodi haruka ba BPA, haruka fali ba Konta bankaria kompania sira nian. Enkuantu Samuel dehan tan katak, projeitu sira ne’ebe laiha kualidade, ADN sei la halo pagamentu, kuandu hadia fila fali mak foin kontinua prosesu pagamentu.

 “Iha kompania lubuk ida mak malandru oituan kuandu tekniku ba haree atu hadia, maibe lakohi hadia entaun tenki pendenti sira nia osan iha tezoru,” nia esklarese.

.