“Deputadu FRETILIN Ho PD Konkorda PM Xanana Halo Remodelasaun”

.

Jornal Timor Post - Kuarta-feira, 09 Janeiru 2013 

Husi uma fukun Parlamentu Nasional (PN), deputadu husi Bancada Opozisaun FRETILIN Inacio Moreira konsidera, membru Governu barak mak laiha kapasidade maibe kontinua okupa fatin iha V Governu konstitusional. 

Nia dehan, membru governu balun involve iha aktu korupsaun, se ida ne’e mak primeiru Ministru kontinua apoia iha tinan lima mai, maske Parlamentu preve orsamentu boot, maibe laiha kapasidade ezekuta, problema sei kontinua mosu. 

“Haree husi referensiade faktu ne’ebe membrus governu sira hatudu ona, ha’u hanon diak liu Primeiru Ministru tenki halo remodelasaun ba iha gabinete bloku nian, nune’e bele tau duni ema ne’ebe iha responsablidade para halo servisu ho diak, maibe ne’e dezafiu ba Primeiru Ministru xanana Gusmao,” dehan deputadu Inacio Moreira ba TP iha PN, Tersa (08/1). 

Inacio hatutan, PM Xanana la halo remodelasaun, tinan lima mai sei la iha progresu ba dezenvolvimentu, tanba membru governu maioria laiha kapasidade jestaun. 

Entertantu, iha tempu hanesan, deputadu husi bancada Partidu Demokratiku Virgilio Hornai hateten, remodelasaun depende ba Primeiru Ministru Xanana Gusmao, tanba nia hanesan Chefe Governu, karik ida ne’e akontese duni, PM xanana tenki kordena ho membru Bloku Koligasaun sira antes foti desizaun. 

“Pessoal ba hau konkorda Primeiru Ministru Xanana halo remodelasaun, nune’e, hasai tiha membru governu ne’ebe laiha kapasidade, maibe, antes situasaun nee akontese, PM Xanana tenki koordena ho bloku koligasaun sira para bele salva guarda nasaun,” Hornai hatutan. 

,