“CPD-RDTL Husu Lere Labele Rona Propaganda”

.

Jornal Timor Post - Tersa - Feira, 15 Janeiru 2013 

Membru Konsellu Popular Demokratiku Republika Timor Leste (CPD-RDTL) husu Maijor Jeneral F-FDTL, Lere Anan Timur atu labele rona propaganda husi ema ne’ebe la gosta prejensa grupu CPD-RDTL iha Suku Welaluhu, Sub Distritu fatuberlu, Distritu Manufahi. 

Tuir portavos relasaun publiku, Marcelino Caldas katak, prejensa CPD-RDTL iha Sub Distritu fatuberliu la’os atu hadau povu nia rai maibe ajuda povu hadia ekonomia liu husi dalan koperativa. Prejensa CPD-RDTL iha sub Distritu refere iha mos konesementu lideransa komunitariu sira. 

“Prejensa CPD-RDTL nian iha Fatuberliu diretamente liu husi karta konesementu ba lider komunitariu sira, agora ami la hatene sira fo konesementu ba povu ka lae?,” dehan Macelo iha Mnadarin, Dili, segunda (14/01). 

Marcelo mos hateten tan katak, CPD-RDTL mos fo karta konesementu ba Primeiru Ministru Kay Rala Xanana Gusmao, nuudar lider rejistensia no veteranus. “Prinsipiu CPD-RDTL nian, lolos laika husu lisensa ba se deit, tanba politika CPD nian luta atu halakon sistema ema seluk nian ne’ebe durante ne’e lori Timor-oan sai atan,” dehan Marcelo. 

Marcelo hatutan tan katak, prejensa CPD-RDTL iha sub Distritu refere hetan mos apoiu maka’as husi Major jeneral Lere no mos Prezidenti Taur Matan Ruak iha altura ne’eba. “Lider nain rua ne’e (Lere ho Taur) koalia iha xefe suku, xefi aldeia no povu sira nia oin iha welaluhu katak, sira konkorda CPD-RDTL hala’o aktividade iha Welaluhu,” hasara marcelo. 

Maibe ikus mai lider sira ne’e rona propaganda husi ema seluk para atu hamosu konfuzaun iha povu nia leet. Marcelo konfesa, CPD-RDTL preokupa ho deklarasaun Maijor Lere nian katak, CPD-RDTL okupa ema nia rain, halo ema la hakmatek no mos kontra konstituisaun, ne’e laloos. CPD-RDTL mos husu ba ema hotu atu lalika halo rezaun oi-oin liu husi propaganda baratu hasoru atividade pozitivu ne’ebe CPD-RDTL halo. 

 Entertantu, antes ne’e, Maijor Jeneral Lere Anan Timur husu ba grupu CPD-RDTL atu retira husi populasaun sira nia rai iha fatuberliu tanba rai ne’e laos rai grupu nian.

.