“CCI-TL Eziji KAK Investiga FP”

.

Jornal Timor Post - Tersa - Feira, 15 Janeiru 2013 

Diretor Nasional Investimentu Enterino Camara Comersiu Industria Timor-Leste (CCI-TL) Teotonio Freitas eziji ba Komisaun Anti Korupsaun (KAK) atu halo investigasaun ba Funsionariu Publiku neebe ka’er projeitu hanesan emprezariu. 

 “Hau fo exemplu funsionariu balun husi parte aprovizionamentu diretamente ba halo kompras iha estranjeiru, loke rejistu ba kompania, ida ne’e taka dalan baa mi emprezariu sira,” dehan nia ba Timor Post, Segunda (14/01) iha Dili. 

Teotonio hateten, hahalok funsionariu sira ne’e bele loke oportunidade ba korupsaun, tanba ne’e nia husu ba governu atu kria lei espesifiku atu funsinariu tenki sai loos funsionariu no ema ne’ebe hakarak sai emprejariu tenki emprezariu duni, la’os ba fali servisu doubru. 

Governu labele tau todan de’it ba sogokan, tanba kultura Timor Leste, kuandu fo sigaru ba malu normal, tanba la liu husi akordu, maibe ba funsionariu ne’ebe involve diretamente iha Projetu ne’e tenki foti medidas. 

 Tuir nia, hahalok ne’e bele fasil ba funsionariu hirak ne’e atu hatama nia familia ba kaer projeitu estadu nian. “hau haree funsionariu barak mak ba hadau malu ba rejistu kompania, hau hanoin governu tenki toma atensaun no KAK mos tenki haree didiak sistema aprovisionamentu,” dehan nia.

Nia komenta, hahalok hanesan ne’e akontese iha aprovizionamentu ministeriu sira, nia fo exemplo dala ruma publikasaun tender sai emprezariu barak ba dudu malu, mais realidade hatudu funsionariu publiku mak iha laran ona, entaun kompania ne’ebe sira joint maka liu oportunidade tender no emprezariu seluk ne’ebe tuir tender saugare deit.

.