Agio Pereira: “Laiha Remodelasaun Iha Governu Bloku Koligasaun”

.

Jornal Timor Post - Kinta-feira, 10 Janeiru 2013

Ministru ba Asuntu Estadu no prezidenti Konsellu Ministru Agio Pereira deklara katak, Governu Bloku Koligasaun forma husi CNRT, PD no FRENTI-Mudanca laiha remodelasaun tamba foin hahu.

Agio dehan, governasaun ne’ebe foin hahu seidauk iha planu atu halo remodelasaun ba nia membru sira, maske publiku kestiaona membru balun laiha kapasidade servisu.

“Governu foin hahu, laiha hanoin ida atu halo remodelasaun estrutura membru governu sira nian,” Agio Pereira esklarese ba Jornalista sira iha Palasiu Governu, Kuarta (09/01) hafoin partisipa enkontru Konselu ministru.

Oportunidade hanesan, Jornalista tenta entervista ho Vise Primeiru Ministru Fernando La sama de Araujo maibe lakohi fo nia komentariu kona-ba issu remodelasaun ba membru V Governu sira.

Maibe, tuir fontes kredivel ne’ebe lakohi f sai nia naran, ba Timor Post, Tersa (08/1) hateten, Primeiru Ministru Kay Rala Xanana Gusmao iha tempu besik sei halo remodelasaun ba estrutura V Governu Konstitusional, tanba indika balun ukun hahu husi IV Governu to’o V Governu, laiha kapasidade nafatin ba ezekusaun orsamentu.

Fontes ne’e realsa, membru governu ka Ministru ou Sekretariu Estadu ne’ebe atu halo remodelasaun membru koligasaun mak nain tolu husi Partidu CNRT, PD nain tolu no Frenti Mudansa nain ida.

Entertantu, opiniaun husi Eis Vise Primeiru Ministru IV Governu, Mario Viegas Carrascalao hateten, atu halo remodelasaun ba governu presiza iha akordu hodi envolve opozisaun.

 “Iha parte seluk ita haree katak, ema barak kompotente iha UDT, FRETILIN, PSD no ASDT iha ema barak, ida ne’e la signifika katak, ema sira ne’e atu tama hot, maibe presiza ema ne’ebe iha kapasidade,” nia dehan ba Timor Post, Tersa (08/01) iha Hotel Timor-Dili.

.