“PN Hasa’e Osan Mina Ba U$ 60”

.

Jornal Timor Post - Sabadu, 01 Dezembru 2012 

Parlamentu Nasional (PN), hasa’e ona osan mina (kombustivel) ba membru deputadu sira husi U$ 40 ba U$ 60 kada semana. 

 Proposta ho numero 13 ne’e hato’o husi deputadu Arao Noe husi bancada CNRT, kuarta (21/11), PN liu husi sesaun plenaria ekstraordinaria halao ona aprovasaun ba proposta ne’e ho votus maioria husi membru deputadu sira ho votu a favor 44, kontra 1 no abstensaun 0. 

Hafoin aprovasaun, Prezidenti PN Vicente Guterres hateten, deputadu sira sei uza osan ne’e atu halo movimentu iha kapital Dili no mos bele hasoru eleitor sira iha Distritu kuandu urjenti, folin total ba proposta ne’e mak U$ 202,800 iha tinan ida. Entertantu, liu husi karta komunikadu ba imprensa ne’ebe Timor Post hetan, Sesta (30/11), Diretur Ejekutivu Judicial System Monitoring program (JSMP), Luis de Oliveira Sampaio hateten, desizaun PN ne’e ignora ona realidade povu nian, kona ba folin kombustivel. 

 “Proposta alokasaun orsamentu ne’e laiha balansu tanba hasa’e benefisiu ne’e to’o kedas 50%, mesmu folin kombustivel la iha mudansa, no proposta ne’e ignora realidade povu nian, ne’ebe oras ne’e hasoru problema boot kona ba folin kombustivel,” dehan Sampaio. 

Sampaio deklara, JSMP observa katak, membru deputadu sira mos sei hetan tan direitu ba kombustivel ba kada semana U$80 ba programa fiskalizasaun iha distritu no mos osan adisional U$ 50 kada loron bainhira sira ba distritu (akomondasaun no hahan). 

Tanba ne’e, Sampaio rekomenda ba Parlamentu Nasional atu uza osan estadu ne’ebe limitadu atu investe ba kapasitasaun ema nian, instituisaun no dezenvolvimentu nasional hodi hasai povu husi mukit no kiak nia laran.

.