Laiha Progresu Dezenvolvimentu “FRETILIN Konsidera Konfuzaun Iha Administrativa”

.

Jornal Timor Post - Sabadu, 01 Dezembru 2012 

Bancada FRETILIN konsidera progresu dezenvolvimentu la la’o durante mandatu IV Governu Konstitusional tanba administrative konfuzaun. 

Realidade ne’e hatudu iha projeitu Pakote Dezenvolvimentu Desentralizasaun (PDD) ne’ebe infrenta problema boot, tanba pagamentu avansadu 25% la la’o, laiha sertifikasaun husi Ministeriu ESTATAL, no ESTATAL du’un ba parte autoridade lokal maka sala, entaun se los maka sala no se maka manda. 

“Ida ne’e, hatudu iha tinan lima mandatu IV Governu hatudu konfuzaun de administrativa, la’os desentralizasaun administrative, tanba ne’e mak desentraliza ba konfuzaun sai nafatin, administrasaun la lao ba oin, osan povu nian sulin hotu ba grupo oan ida nia liman, tanba inkapasidade kontrola husi governu,” hateten deputadu Estanislau da Silva husi bancada FRETILIN (27/11). 

Estanislau hatutan, durante tinan lima periode IV Governu mosu korupsaun maka’as, ne’ebe, involve Ministru, Sekretariu Estadu no Diretor Jeral balun, realidade Ministru balun ba hatan ona iha Tribunal, ne’e atu hateten deit katak korupsaun buras duni iha IV Governu nia tempu, grupu balun mos komesa riku ona ho povu nia osan. 

 “Ne’e hatudu katak, osan povu nia ne’ebe aprova durante tinan lima kuaze bilaun 5 resin ne’e ezekuta la los, Ministru balun ba ona Tribunal, nee katak sira komete duni korupsaun, ita labele bosok malu, hau besik tinan 10 nia laran, la iha osan atu sosa kareta foun, maibe diretur balun foin tama servisu sosa kareta prado foun ona, maibe ida ne’e keta sira nia avi riku karik,” katak Estanislau.

.