“Klamar Eroi Sira Hafuhu Hela Membru Governu”

.

Jornal Independente - Sesta-feira, 21 Dezembru 2012 

Eis Komandante Xefe Luta Libertasaun Nasional, Kay Rala Xanana Gusmao katak, fiar eroi sira ne’ebe entrega sira vida tomak hodi mate ba rai ida ne’e nia klamar sei hafuhu hela membru governu sira nia servisu no dedikasaun iha tempu ukun rasik an ne’e. 

 “Ba responsavel tomak, estadu, iha parlamentu ka governu ita haka’as an hanesan sira ne’ebe mak sira nia ruin ita hakoi tiha ona, sira nia klamar sei haree tuir nafatin ita oinsa ho fasilidade oioin, ita halo tuir sira nia ezemplu ka lae,” dehan nia iha serimonia funeral, saudozu nain neen iha Metinaru, horsehik. Eis gerileiru ne’e dehan, lider no Timor oan hotu ne’ebe mak hahu husi ASDT to’o FRETILIN no to’o 1999 mate ba rai ida ne’e nia independensia, sira ne’e mak eroi, tanba sira mate ba rai ida ne’e nia liberdade. 

Xanana dehan, lider sira ne’ebe sai pioneiru ba funu ida ne’e merese atu estadu fo onra ba sira nia luta. “Hahu ASDT ,osu iha 20 Maiu 1974 no nakfila an ba FRETILIN estrutura sei hetan fatin no mahon iha jardin heroi ne’e,” tenik nia. 

Primeiru Ministru ne’e hatutan katak, sira ne’ebe mak tuir ASDT nia lalaok sai membru Comite Central FRETILIN (CCF) to’o tempu ne’ebe komandante balun mos hili nudar membru CCF, partisipa ho ida-idak nia periodu, maibe sira hotu ne’ebe mak toba iha ne’e hotu-hotu partisipa iha prosesu istoriku ne’e hodi halo ita hetan ukun aan.

,