“Kaixaun Konis To’o Iha Dili”

.

Jornal Timor Post - Segunda, 03 Dezembru 2012 

Kaixaun ne’ebe mak atu tau halot Saudozo Konis Santana nia ruin, Sesta (30/11) to’o ona iha Dili ho aviaun Batavia air ne’ebe familia rasik mak prepara iha Indonezia. 

Hafoin to’o iha Aeroportu Internasional Presidenti Nicolau Lobato, familia sira lori ba iha taibesi, dili. Familia saudozo Konis Santana ba Timor Post katak, prosesu hola kaixaun husi Indoensia, familia rasik mak atende inklui tula iha kargu aviaun, tamba tuir kostume Tutuala nian, katak kaixaun hanesan lia mate ne’ebe familia mak tenke responsabliza hodi halo tuir tradisaun. 

Nune’e, caption foto edisaun Timor Post 1 de Dezembru ne’ebe hateten, governu mak prepara kaixaun, ne’e la los, lolos ne’e familia mak prepara tuir tradisaun. 

 Kaixaun to’o iha airo portu tuku 13:30 OTL, depois familia sira informa deit ba sekretariu estadu asuntu veteranus, Julio Metamalik sobre kaixaun saudozo to’o iha Dili. Iha inkontru inisiu kedas familia deside ona katak, tuir uju kostumu familia mak sei responsabliza mesak. 

Konaba folin kaixaun nian, tanba hola diretamente husi fabrika iha Indonezia mak nia presu ne’e hamutuk RP 17.000.000 (tujuh belas juta rupiah), enkuantu tula kaixaun mai Dili, kompania STAT ne’ebe lidera husi Joao Bosco Guterres mak responsabliza no ajuda. Kestaun seluk, sobre orsamentu atu hodi prepara halao serimonia ritual no estadu nian komisaun hetan deit orsamentu kuaze 50% deit, tanba ne’e komisaun labele prepara buat hotu. 

Fatin rai kaixaun, komisaun prepara iha asosiasaun veteranus Taibesi, nune’e 1 de dezembru familia hamutuk ho governu komesa hamsou komisaun atu hodi halao servisu tuir prosesu, iha dia 8 de Dezembru familia sira (tutuala no Mertutu) hamutuk ho lia nain sira koalia tuir lisan, iha dia 9 de Dezembru, dader komesa ke’e rate saudozo nian, iha loron ne’e kedas saidozo nia ruin ke’e sai no halibur hamutuk hodi hein serimonia tuir mai. 

Iha dia 10 de Dezembru saudozo nia ruin tau iha Mertutu, durante kalan tolu, luta nain sira husi reijaun IV halibur hamutuk iha Mertutu. Iha dia 12 de Dezembru, tuir orientasaun husi Primeiru Ministru, sei halao parade militar depois lori ba Tutuala. 

 Saudozu nia ruin sei lori ba Tutuala iha dia 13 de Dezembru, iha dia 18 de Dezembru sei halo parada militar antes atu lori fali mai Metinaru hodi halot iha Jardim dos herois ne’e familia sei entrega ba estadu. Saudozo Konis Santana hanesan, lider ikus liu husi FRETILIN, lider nasional, lider rezistensia no hanesan lider nasional husi nia pasazen ne’ebe naruk husi Tutuala hakotu is iha Mertutu hatudu ezemplu boot ida ba Timor oan hotu katak, rai Timor ida deit. 

 Hanesan lider FRETILIN, ne’ebe mak hakotu is iha subar fatin Mertutu, tanba ne’e dirasaun Comite Central FRETILIN (CCF) rekoinese no prepara serimonia ida nune’e, fo ultimatu homenazen ba lideransa ne’ebe sai saudozo ona. 

 Tuir ajenda no fatin ne’ebe mak prepara ona katak, Saudozo Konis Santana sei hakoin besik iha Saudozu Primeiru Prezidenti RDTL, Francisco Xavier do Amaral nia sorin iha Jardim dos Herois Metinaru. 

.