Situasaun Dili Halo Povu Paniku; “PN Husu Governu Labele ‘Bilan’”

.

Jornal Nacional Diario - Tersa-feira, 06 Novembru 2012 

Reprezetante povu iha uma fukun Parlamentu Nasional husi bancada FRETILIN Florentina Smith hateten katak, situasaun iha Dili laran agora dadaun halo povu paniku, tanba kalan-kalan sempre mosu destroisaun ka rona sasan tarutu, tanba ne’e husu ba Governu labele abandona situasaun ne’e. 

“Situasaun agora iha rai laran, agora dadaun ne’e kalan-kalan, ita lahatene los paison ka, bala ka, kilat tanba, agora dadaun iha tempu kalan sempre tartutu hela deit, orsida ema duni malu, ema hakilar malu, ema ameasa malu no ita haree katak, numero krime ne’e komesa aumenta,” dehan deputada Florentina Smith ba Jornalista segunda (05/11) iha Parlamentu Nasional. Ba kestaun ne’e, nia husu atu komando PNTL tenki reforsa tan Policia Komunitariu mak iha liu funsaun ka papel importante atu tau seguransa ba povu hotu iha suku no Aldeia. 

Nia dehan tan, agora dadaun ne’e, povu komesa trauma relasiona ho mandatu UNMIT nian ne’ebe mak atu remata ona iha tempu badak. 

Iha sorin seluk deputadau husi Bancada CNRT, Igilda Soares mos rekoinese katak, dadaun ne’e mosu duni situasaun ladiak iha tempu kalan tanba, labarik sira balun lori bela ba tuku halimar hodi tarutu maibe membru PNTL sira difisil atu kontrola. 

 “Liu-liu kalan buat ne’e tarutu, loron sira halo embora desgosta ema barak maibe kalan pior liu, tanba maske agora dadaun ne’e sira laiha ona estrada ibun desde Governu halo despedida ho UNMIT, maibe bela mak tarutu ba mai hela deit,” dehan nia. 

 Nia hatutan katak, situasaun inkontroladu hanesan ne’e halo ema paniku hodi kalan la toba, tanba ne’e polisia tenki tau matan ba problema ida ne’e atu nune’e labele tarutu beibeik iha tempu kalan. 

.