Projeitu Bee-Moos Iha Bauro: “Deskonfia ADN Fasilita Kompania Heru”

.

Jornal Timor Post - Segunda-feira, 05 Novembru 2012 

Komunidade Suku Bauro, sub Distritu Losalos, Distritu Lautem deskonfia Ajensia Dezenvolvimentu Nasional (ADN) fasilita komapania HERU, Unip. Lda hetan pagamentu 95% maske projeitu pakote Dezenvolvimentu Desentralizasaun (PDD) II iha Aldeia Luarai no Bauro Seidauk remata. 

 Xefi Suku Bauro, Sidalio Freitas informa, projeitu PDD II iha Aldeia Luarai ni Suku bauro ho montante orsamentu U$ 99.985,00, projeitu ne’e rasik hahu iha loron 25 Jullu remata 30 Dezembru 2012, maibe to’o agora seidauk remata tuir Bill Of Quantity (BOQ) ne’ebe iha. 

Tuir BOQ kompania tenki fura Be’e, no halo kanalizasaun to’o remata maibe realidade kompania halo deit kanalizasaun ho torneira 12, maibe monta hotu iha publiku enkuantu torneira ida diretur kompania dada ba ninia privadu. 

Nune’e mos, to’o agora komunidade seidauk bele asesu bee moos, tanba bomba ne’ebe uza la tuir BOQ, inklui mos kanalizasaun ne’ebe halo komunidade kontinua hakilar be’e moos. Xefe suku ne’e hateten, tuir prosesu normal ba projeitu ne’ebe deit, wainhira konstrusaun atinji ona 100 no halo ona inspensaun maka foin bele halo prosesu pagamentu final. 

 “Ami husu klarifikasaun ba projeitu ida ne’e, tanba pagamentu tama ona pursentu 95, maibe projeitu seidauk remata, ne’e it abele deskonfia se mak iha kotuk, Karin ida ne’e ADN mak iha kotuk ka SAS mak iha kotuk, maibe ita la hatene,” dehan Xefe suku Bauro, Sidalio Freitas, (03/11). 

Nia mos hatutan tan katak,” iha hau nia suku laran ne’e hau seidauk haree ADN mai halo verifikasaun iha nee, karik nia mai subar deit hodi konfirma mak hau lahatene, hau rasik iha ne’e seidauk hasiru malu ho ADN kona ba projeitu ne’e,” afirma xefi Suku Bauro. 

Nune’e nia afirma, Administrador Distritu Lautem halo ona samada atensaun ba iha kompania atu bele hare hodi kontinua halo kompletu projeitu ne’e para komunidade bele utiliza, xefi rasik mos halo ona karta ba KAK atu bele haree kestaun ne’e. 

“Ami husu ona ba KAK liu husi karta ne’ebe ami haruka atu halo investigasaun KDD, SAS, AND inklui mos ekipa EKD husi suku nian, tanba iregularidade mosu barak iha projeitu nia laran, husi inisiu mai to’o prosesu pagamentu,” informa xefi suku.

.