“Povu Timor Leste 70% Sei Hela Iha Uma A’at”

.

Jornal Independente - Tersa-feira, 06 Novembru 2012 

Rejultadu peskija husi organizasaun Naun-Govermental (ONG) Forum Tau Matan (FTM) identifika, maioria populasaun iha Timor Leste hamutuk pursentu 70 mak sei hela iha uma ne’ebe laiha kondisaun diak no hetan ameasa atu sain ain ba rai pedasku ida. 

Diretor Ejekutivu FTM, Joao Piquinho hateten, fenomena social ohin loron, numero populasaun aumenta maka’as. 

 “Agora ita nia problema sai nain ba rai seidauk rezolve ho diak, partikularmente uma laiha kondisaun diak, kuaze ita nia populasaun pursentu 70 hela iha uma a’at,” Joao Pequinho ba INDEPENDENTE iha Hotel Timor, Dili foin lalais ne’e, hafoin seminariu ne’ebe koalia kona ba problema nain ba rai, uma diak ba populasaun. 

Pequinho mos dehan tan katak, impaktu husi disputa rai aumenta iha fatin hotu rejulta ema mate iha kazu Atabae. Nia hatutan tan katak, Lei artigu 54 no 58 husi konstituisaun RDTL preve katak, estadu tenke rekoinese direitu sidadaun hotu kona ba hela fatin adekuadu, ida ne’e katak uma no rai ho kondisaun diak ba povu. 

 Seminariu Nasional foin lalais ne’e, organiza husi rede ba rai, Diretur ba uma diak, Provedor Direitus Humanus e Justica (PDHJ) inklui United Nation Human Right Unit. 

.